Elimizde oqýshylar qaýipsizdigine arnalǵan jańa pılottyq joba tekserilip jatyr
ALMATY. KAZINFORM — Almaty qalasy men oblysynda oqýshylardyń qaýipsizdigi men ál-aýqatyn arttyrýǵa baǵyttalǵan jańa joba iske qosyldy.
Jańa oqý jylynan bastap BilimClass tegin elektrondyq jýrnalynda Almaty qalasy men Abaı oblysynyń prokýratýralarymen birlesip ázirlengen áleýmettik osal toptaǵy oqýshylarǵa monıtorıng júrgizý fýnktsııasy iske qosylmaq. Bul júıe balanyń qıyn jaǵdaıda jalǵyz qalýyna jol bermeýi tıis.
BilimClass jobasynyń jetekshisi Farhat Úsen monıtorıngtiń jumys isteý mehanızmin túsindirdi. Onyń sózinshe, jańa júıe oqýshyǵa qatysty mańyzdy aqparatty bir ortaǵa jınap, onyń jaǵdaıyn jan-jaqty baqylaýǵa múmkindik beredi.
— Balalardyń áleýmettik mártebesi men esepte turýy týraly málimetter bilim berý mekemesinen tys saqtalsa, sabaqqa qatysýy men baǵalary BilimClass bazasynda jınalady. Osy eki derekkózdi biriktirmeıinshe, esepte turǵan oqýshynyń mektepten shetteı bastaǵanyn der kezinde ańǵarý múmkin emes. Osydan baryp kómek kórsetý sharalary tym kesh bastalady. Jańa joba dál osy túıtkildi sheshýge arnalǵan, — dedi ol.
Aıtýynsha, modýl balanyń áleýmettik jaǵdaıyn, sabaqqa qatysýyn, oqý úlgerimin jáne psıhologııalyq faktorlardy keshendi túrde taldaıdy. Sıgnal túsken sátte arnaıy mobıldi top jedel kómek kórsetýge múmkindik alady. Pılottyq joba 2026 jyldyń qyrkúıeginde bastalyp, 6 aıǵa sozylmaq. Nátıjege qaraı júıeni ózge óńirlerge engizý josparlanyp otyr.
Farhat Úsen prokýratýra organdary áleýmettik sanattaǵy oqýshylar tizimin jasaqtasa, BilimClass úlgerim men sabaqqa qatysý dınamıkasyn qadaǵalaıtynyn atap ótti.
— Oqýshylar tizimi shuǵyldyǵyna qaraı joǵary qaýiptegi jáne esepte turǵandardan bastap, ortasha qaýiptegi oqýshylarǵa deıin 4 topqa bólinedi. Munda ár balanyń qaı pánnen qanshalyqty artta qalyp jatqany naqty kórinedi, — dedi Farhat Úsen.
Sonymen qatar ol balalardyń jeke aqparatynyń qupııalyǵyn saqtaý — jobanyń eń basty basymdyqtarynyń biri ekenin atap ótti. Onyń sózinshe, júıede aqparattyq qaýipsizdik talaptary qatań saqtalatyn bolady. Prokýratýra qyzmetkeri tek óz modýli men profılin ǵana kóredi. Platformanyń basqa bólimderine óte almaıdy, tipti tikeleı silteme arqyly kirýge de tyıym salynǵan. Al maman tek ózine qarasty aýmaqtyń málimetterine ǵana qol jetkize alady. Júıege kirý eGov Mobile qoldanbasy arqyly rastalady.
Eske salaıyq, buǵan deıin Almaty mektepterinde elektrondy kúndelik Kundelik-ten BilimClass-qa qalaı aýysqanyn jazǵanbyz.
