Elimizde oqýlyqtardy daıyndaý jáne baqylaý tártibi jańartyldy
ASTANA. KAZINFORM — QR Joǵary aýdıtorlyq palatasynyń nusqamasy boıynsha oqýlyqtar men oqý-ádistemelik keshendi (OÁK) daıyndaýǵa, saraptaýǵa jáne monıtorıngteýge baılanysty normatıvtik bazany jańartý jáne negizgi protsesterdi avtomattandyrý boıynsha jumys júrgizildi.
Vedomstvo deregine sáıkes, ótken jyldyń aqpan aıynda orta bilim berýdi damytýǵa jáne sapasyn arttyrýǵa bólingen qarajattyń paıdalanylý tıimdiligine memlekettik aýdıt júrgizildi. Tekserý qorytyndysy boıynsha QR Oqý-aǵartý mınıstrligine Oqýlyqtar men oqý-ádistemelik keshenderdi daıyndaý, saraptaý, synaqtan ótkizý, monıtorıngteý jáne basyp shyǵarý qaǵıdalaryna ózgerister engizý tapsyryldy.
Ózgeristerde:
- ýákiletti organnyń jekelegen baspalarǵa suraý salmaı taqyryptyq jospardy bekitýi;
- taqyryptyq jospardy mindetti túrde jarııalaý;
- avtorlyq ujymǵa tıisti bilimi men jumys tájirıbesi bar keminde úsh bilikti maman qosý týraly talapty engizý;
- oqýlyqtarǵa saraptamalyq baǵalaý júrgizýdiń naqty ólshemsharttaryn belgileý;
- oqýlyqtardy jańartýdyń 5 jyldyq merzimin saqtaý úshin oqýlyqtar men OÁK sapasyn monıtorıngteý tásilderin jańartý kózdelýge tıis boldy.
— Nátıjesinde atalǵan ózgerister QR Oqý-aǵartý mınıstriniń 24 qarashadaǵy buıryǵymen bekitildi. Jańartylǵan normalar taqyryptyq jospardy qalyptastyrý tártibin, avtorlyq ujym quramyna qoıylatyn talaptardy, saraptamalyq baǵalaý ólshemsharttaryn reglamentteıdi, sondaı-aq oqýlyqtar men OÁK sapasyn monıtorıngteý rásimderin naqtylaıdy. Taqyryptyq jospar endi avtomatty túrde jasalady: baspalar men ázirleýshiler Respýblıkalyq ǵylymı-praktıkalyq bilim mazmunyn saraptaý ortalyǵynyń www.bmso.kz ınternet-resýrsy arqyly ótinim beredi. Oqýlyqtar men elektrondyq oqýlyqtardy daıyndaýdy quramynda tıisti oqytý kýrstarynan ótken ǵalymdar, ádiskerler jáne pedagogter bar avtorlyq ujymnan turatyn ázirleýshiler nemese baspalar júzege asyratyny bekitilgen, — delingen habarlamada.
Buǵan qosa mınıstrlikke mektepterdiń kitaphana qorlaryn esepke alý jáne baqylaý protsesterin, sondaı-aq oqýlyqtar men OÁK-ni saraptamaǵa qabyldaýdy avtomattandyrý tapsyryldy. Negizgi protsesterdi avtomattandyrýdy jáne normatıvtik bazany aıtarlyqtaı pysyqtaýdy qamtıtyn qabyldanǵan sharalar oqýlyqtar men ilespe materıaldardyń sapasyn arttyrýǵa, sýbektıvtilik pen qatelikke jol berý táýekelderin azaıtýǵa, sondaı-aq olardyń ýaqytyly jańartylýyn qamtamasyz etýge múmkindik beredi.
Budan buryn Joǵary aýdıtorlyq palata eldegi eki iri qordy tekseretinin jazǵan edik.