Elimizde oqý úshin 550 shetel azamatyna bilim granty berildi
ASTANA. KAZINFORM — 2026-2027 oqý jylyna arnalǵan Qazaqstan Respýblıkasynyń azamattyǵy joq shetel azamattaryna, onyń ishinde qazaq ultynyń ókilderine arnalǵan memlekettik stıpendııalyq baǵdarlamasy aıasyndaǵy konkýrstyq irikteý aıaqtaldy. Baıqaý qorytyndysy boıynsha 550 stıpendııa ıegerinen turatyn negizgi tizim bekitildi.
Ǵylym jáne joǵary bilim mınıstrliginiń habarlaýynsha, bul baǵdarlama 2019 jyldan beri júzege asyrylyp keledi jáne halyqaralyq akademııalyq yntymaqtastyqty damytýǵa, sondaı-aq daryndy sheteldik jastardy Qazaqstannyń jetekshi joǵary oqý oryndarynda bilim alýǵa tartýǵa baǵyttalǵan.
2026 jyly baǵdarlama sheńberinde:
- bakalavrıat baǵdarlamalary boıynsha oqýǵa — 490 bilim berý granty;
- magıstratýra baǵdarlamalary boıynsha oqýǵa — 50 grant;
- doktorantýra baǵdarlamalary boıynsha oqýǵa — 10 grant bólindi.
Konkýrstyq irikteýge álemniń 71 elinen 16 098 úmitker qatysty. Qatysýshylardyń edáýir bóligi Qazaqstan Respýblıkasynyń azamattyǵy joq qazaq ultynyń ókilderi — qandastar boldy.
— Baǵdarlamany iske asyrýǵa 886 bilim berý baǵdarlamasyn usynǵan Qazaqstannyń 27 joǵary oqý orny qatysady. Stıpendııa ıegerleriniń basym bóligi Sh. Ýálıhanov atyndaǵy Kókshetaý ýnıversıtetinde, Astana IT University-de, Q.I.Sátbaev atyndaǵy Qazaq ulttyq tehnıkalyq zertteý ýnıversıtetinde, L. N. Gýmılev atyndaǵy Eýrazııa ulttyq ýnıversıtetinde, Abylaı han atyndaǵy Qazaq halyqaralyq qatynastar jáne álem tilderi ýnıversıtetinde jáne elimizdiń basqa da joǵary oqý oryndarynda bilim alady, — dep habarlady vedomstvo.
Bıyl baǵdarlamaǵa qatysýshylardyń geografııasy aıtarlyqtaı keńeıgen. 2025 jyly oqýǵa usynylǵandar qatarynda 26 eldiń ókilderi bolsa, 2026 jyly bul kórsetkish 49 memleketke deıin artty. Eń kóp ótinish Palestına, Indonezııa, Reseı Federatsııasy, Ózbekstan Respýblıkasy jáne Aýǵanstannan kelgen úmitkerlerden tústi. Alǵash ret stıpendııa ıegerleri qatarynda AQSh, Italııa, Germanııa, Maldıv Respýblıkasy jáne Koreıa Respýblıkasy azamattary bar.
Eske salaıyq, buǵan deıin bilim grantyna ótinish bergender sany 127 myńǵa jýyqtaǵanyn habarlaǵan edik.
