Elimizde netto-tutynýshylarǵa arnalǵan alǵashqy platforma-agregator iske qosyldy

QARAǴANDY. KAZINFORM – Elimizde netto-tutynýshylarǵa arnalǵan platformanyń – agregatordyń biregeı jobasy iske qosyldy. Bul týraly Energetıka mınıstrliginiń baspasóz qyzmeti habarlady. 

Saltanatty rásimge Energetıka mınıstrliginiń Memlekettik energetıkalyq qadaǵalaý jáne baqylaý komıtetiniń tóraǵa orynbasary Jalǵas Shógelbaev qatysyp, sóz sóıledi. 

– Bul joba – jaı ǵana tájirıbe emes, ony masshtabtap, basqa kásiporyndarǵa engizýge bolatyn túsinikti, jumys isteıtin model. Ár qadamyn birtindep, qıyn kedergilersiz júzege asyrýǵa bolady, - dedi Jalǵas Shógelbaev.

Pılottyq joba «Abaı tigin fabrıkasy» alańynda júzege asyryldy, onda kún elektrstantsııasy iske qosyldy. Tutynýshy tek alańdy usyndy – qalǵan barlyq tapsyrmalardy Green Platform óz moınyna aldy.

Netto-tutynýshylar sektoryn damytý – Energetıka mınıstrliginiń basym baǵyttarynyń biri. Bul baǵyt energııany únemdeýge, tasymaldaý kezinde shyǵyndardy azaıtýǵa ǵana emes, sonymen qatar ulttyq energojúıeniń turaqtylyǵyn kúsheıtip, jańa KES jáne JES iske qosylǵanda balansty qamtamasyz etýge múmkindik beredi.

Osy maqsatta 2024 jyly bıznes pen azamattardy shaǵyn masshtabtaǵy jańartylatyn energııa kózderi (JEK) ornatýǵa yntalandyratyn zańnamaǵa ózgerister engizildi.

Sektordy masshtabtaý úshin ınvestıtsııalardy tartý jáne tehnologııalyq aýtsorsıngti damytý mańyzdy. Green Platform keshendi tásil usynady: kún panelderin tańdaý men ornatýdan bastap olardyń turaqty qyzmet kórsetýine deıin «bir tereze» prıntsıpi boıynsha jumys isteıdi.

Joba Qazaqstandaǵy energetıkany «jasyldandyrý» múmkindikterin keńeıtip, shaǵyn jáne orta bıznes qatysýyn arttyrýǵa jol ashady.

Buǵan deıin Qostanaıda kún elektr stantsııasy iske qosylǵanyn jazǵan edik.