Elimizde nelikten keıbir joldar jyl saıyn jóndeledi – mınıstr jaýaby

ASTANA. KAZINFORM – Qazaqstanda keıbir joldar jyl saıyn jóndeýden ótedi. Onyń sebebin Kólik mınıstri Marat Qarabaev túsindirdi.

«Joldardyń jóndeýdiń birinshi túri – aǵymdyq, ol jyl saıyn júredi. Ekinshisi – tehnologııa boıynsha ár bes jyl saıyn jasalatyn ortasha jóndeý. Úshinshi túri – kúrdeli jóndeý, joldar 15 jyldan keıin jóndeledi. Siz aıtyp otyrǵan jyl saıyn júrgiziletin ýchaskeler ortasha jóndeýden ótip jatyr. Jolda shuńqyrlar paıda bolady, sondyqtan aǵymdaǵy jóndeýden keıin ortasha jóndeý júrgiziledi. Bul jol salasy úshin qalypty jaǵdaı, bul jerde másele sapaǵa kelip tirelmeıdi, kóptegen faktor bar. Mysaly, aýyr júkterge qatysty, normalarǵa sáıkes, jolǵa túsetin júkteme 25 tonna bolýy kerek, al keıde 100 tonnadan asyp ketedi. Bul joldy buzady, osyǵan baılanysty qosymsha jóndeý jumystaryn talap etedi», - dedi Marat Qarabaev Májilis alańynda BAQ ókilderiniń saýalyna jaýap bere otyryp.

Sondaı-aq, mınıstr joldardy jóndeýge bólinetin qarjynyń jetispeıtinin aıtyp otyr.

Buǵan deıin M.Qarabaev tasqyn sý basqan respýblıkalyq joldardy jóndeýge 8,5 mlrd teńge kerek ekenin aıtqan edi.