Elimizde nege sıyr eti qymbat – mınıstr jaýaby

ASTANA. KAZINFORM – Aýyl sharýashylyǵy mınıstri Aıdarbek Saparov elimizde sıyr eti baǵasynyń ósý sebebin túsindirdi.

Mınıstr keltirgen málimetke súıensek, qazir elimizde bir keli sıyr etiniń ortasha baǵasy 2960 teńge. Al tiri kúıinde óńirlerdegi baǵaǵa baılanysty 1250-1500 teńge aralyǵynda satylyp jatyr.

– Soıylǵannan keıin shamamen 50% et qalady. Osyǵan sáıkes, et baǵasy 2700–2800 teńge kóleminde qalyptasady. Alaıda bólshek saýdadaǵy baǵany baqylaý qıyn, óıtkeni baǵa ústemesin saýda oryndary men deldaldar belgileıdi, – dedi Aıdarbek Saparov Úkimet otyrysynan keıin ótken baspasóz máslıhatynda.

Osy oraıda mınıstr Saýda jáne ıntegratsııa mınıstrligimen birlesip ústeme jáne shekti baǵaǵa monıtorıng júrgizilip jatqanyn aıta kele, jekelegen jaǵdaıda aıyppul salynatynyn eskertti.

Vedomstvo basshysynyń aıtýynsha, elimizde et jetkilikti, eksporttyq áleýet te saqtalǵan. Ótken jyly 22 myń tonnadan astam sıyr eti eksporttaldy, bul shamamen 122 myń iri qara men 1 mıllıonǵa jýyq qoı.

– Negizgi problema — qaıta satý tizbeginde bolyp otyr. Fermerler ónimdi ózindik qunynan tómen baǵada satýǵa daıyn emes, sebebi mal ósirý úlken shyǵyndy talap etedi. 3500 teńge kólemindegi baǵa — ekonomıkalyq turǵydan negizdelgen. Kórshi memleketterde, mysaly, Ózbekstan, Túrikmenstan men Tájikstanda ettiń baǵasy 6 myń teńgege deıin jetedi. Qazaqstan etpen tolyq qamtamasyz etilgen. Deldaldar arasyndaǵy retsizdikti joıý mańyzdy, sonda jaǵdaı turaqtalady. Jalpy, et baǵasy turaqty, – dedi mınıstr.

Buǵan deıin habarlaǵanymyzdaı endi qazaqstandyqtardyń etti fermerlerden tikeleı onlaın satyp ala alý múmkindigi bolady.