Elimizde mýzeıge kelýshiler sany 6 mln-ǵa jýyqtaǵan
Elimizde mýzeı isi qalaı damyp jatyr? Kelýshiler sany qansha? Bul saýaldarǵa QR Mádenıet jáne aqparat mınıstrligi Mádenıet komıtetiniń tóraǵasy Kúmis Seıitova jaýap berdi, dep habarlaıdy Kazinform.
«Mádenıet jáne aqparat mınıstrliginiń qoldaýymen alǵash ret uıymdastyrylyp otyrǵan «Qazaqstan mýzeı qyzmetkerleriniń I kongresine» qosh keldińizder. Memleket basshysy bıylǵy joldaýynda mádenıetti, bilimdi, ǵylymdy damytý arqyly qazirgi ashyq álemniń bir bólshegi bolýǵa umtylýymyz kerek ekenin erekshe atap ótti. Ózderińiz bilesizder ultymyzdyń san ǵasyrlyq mádenıeti men tarıhyn halyqaralyq deńgeıde nasıhattaýda mýzeılerimizge úlken mindetter júktelip otyr. Elimizde 270-ten astam memlekettik mýzeı bar. Olar Memleket basshysynyń tapsyrmasyn laıyqty iske asyrýǵa óz úlesin qosyp keledi», - dedi Kúmis Seıitova elordada mýzeı qyzmetkerleriniń І kongresinde.
Komıtet basshysynyń aıtýynsha, mýzeıge qyzyǵýshylyq jyldan jylǵa artyp keledi.
«Byltyr elimiz boıynsha mýzeıge kelýshiler sany 6 mıllıonǵa jýyqtady. Bul elimizdiń mádenı qundylyqtaryna degen qyzyǵýshylyqtyń jyldan-jylǵa artyp kele jatqanynyń nyshany dep bilemiz. Búgin Ulttyq mýzeıde tuńǵysh ret uıymdastyrylyp otyrǵan Qazaqstan mýzeı qyzmetkerleriniń I kongresi otandyq mýzeı salasynyń kásibı mamandarynyń ózara tájirıbe almasatyn turaqty dıalog alańy bolatynyna senimdimin», - deıdi ol.
Aıta keteıik, búgin elordada mýzeı qyzmetkerleriniń І kongresi ótip jatyr.
