Elimizde munaı óndirilip jatqan 289 ken ornynda 4,38 mlrd tonna qor bar

ATYRAÝ. KAZINFORM — Qazaqstannyń ár óńirinde munaı óndirilip jatqan 289 ken orny bar. Bul ken oryndarynan alynatyn munaıdyń qory 4,38 mlrd tonnaǵa baǵalanyp otyr.   

ENERGY MONITOR telegram arnasynyń málimetine súıensek, munaı qorynyń basym bóligi batys óńirlerdegi ken oryndarynyń qoınaýynda jatyr. 

Bıyl qazaq munaıynyń alǵashqy tamshysy alynǵanyna 125 jyl tolady. Álemdik naryqta barrelmen baǵalanatyn alǵashqy otandyq munaı 1899 jyly Atyraý oblysynda óndirilgen.

Qazir bul óńirdegi «Teńiz», «Qashaǵan» sekildi iri ken oryndary shetel ınvestorlarymen birge ıgerilip jatyr. Atyraý oblysyndaǵy osyndaı jáne ózge de ken oryndarynan óndiriletin 3,2 mlrd tonna «qara altyn» bar. Bul elimizde óndirilýi tıis munaı qorynyń 73 paıyzyn quraıdy. 

Budan keıingi kómirsýtekti shıkizattyń mol qory munaıly túbek atanǵan Mańǵystaý oblysyndaǵy ken oryndarynda barlanǵan. Mundaǵy munaıdyń qory — 0,56 mdrd tonna. Al, Aqtóbe oblysynda 0,36 mlrd, Qyzylorda oblysynda 0,12 mlrd tonna «qara altyn» bar dep esepteledi. 

Batys Qazaqstan oblysyndaǵy ken oryndarynan alynatyn «qara altynnyń» qory 0,09 mlrd tonnany qurap otyr. Elimizdiń ózge óńirlerindegi tabıǵı baılyqtyń úlesi — 0,05 mlrd tonna. 

Eske sala ketelik, buǵan deıin «Baký-Tblısı-Djeıhan» qubyrymen munaı eksporty 1 mln 392 myń tonnaǵa ulǵaıǵanyn habarlaǵan bolatynbyz.