Elimizde munaı óńdeý zaýyttary keńeıtiledi

ASTANA. KAZINFORM — Qazaqstanda munaı ónimderin óńdeý salasynda qandaı ilgerileý bar? Bul suraqqa Energetıka mınıstrligi jaýap berdi.

— Elimizdiń munaı óńdeý ónerkásibiniń negizgi mindeti — ekonomıkanyń ósýin jáne ishki naryqtyń joǵary sapaly janar-jaǵarmaı materıaldaryna qajettiligin qamtamasyz etý. Bul mindetti 3 negizgi otandyq munaı óńdeý zaýyty (MÓZ) oryndaıdy. Atyraý, Pavlodar jáne Shymkent óńdeý zaýyttary jáne Aqtaý bıtým zaýytynda munaı óńdeýdiń jalpy kólemi jylyna 18 mln tonnaǵa deıin, — delingen mınıstrliktiń Kazinform agenttigine bergen jaýabynda.

Qazaqstan Respýblıkasynyń munaı óńdeý salasyn damytýdyń 2024-2040 jyldarǵa arnalǵan tujyrymdamasynyń jobasynda munaı óńdeý qýattaryn keńeıtý jobalary kózdelgen.

Bul turǵyda:

• Shymkent MÓZ jylyna 6 mln-nan 12 mln tonnaǵa deıin;
• Pavlodar MHZ jylyna 5,5 mln-nan 8 mln tonnaǵa deıin;
• Atyraý MÓZ jylyna 5,5 mln-nan 6,7 mln tonnaǵa deıin;
• Aqtaý bıtým zaýyty jylyna 1 mln-nan 1,5 mln tonnaǵa deıin munaı jáne tıisinshe bıtým óndirý jylyna 500-den 750 myń tonnaǵa deıin.

— Sondaı-aq 2030 jylǵa qaraı qýaty jylyna keminde 10 mln tonna munaı óndiretin jańa munaı óńdeý zaýytyn salý jóninde sheshim qabyldaý qajet, — dep atalyp ótken vedomstvo aqparatynda.

Eske salsaq, byltyr kúzde QR Energetıka mınıstri Almasadam Sátqalıev elimizde jańa munaı óńdeý zaýyty batys óńirde salynatynyn málim etti.