Elimizde munaı-gaz salasynda 15 jańa taýar óndiriledi
ASTANA. KAZINFORM — Úkimet otyrysynda Energetıka mınıstri Erlan Aqkenjenov jańa óndiris túrlerin iske qosý quny 37,7 mlrd teńge bolatynyn málimdedi.
Onyń sózinshe, jobalar munaı-gaz salasynda suranys joǵary ónim shyǵarýdy keńeıtýge, jumys oryndaryn ashýǵa jáne jergilikti óndiristi damytýǵa baǵyttalǵan.
– Munaı-gaz salasynda barynsha suranysqa ıe túpnusqa taýarlardyń álemdik jáne qazaqstandyq óndirýshilerimen birlesip, 37,7 mlrd teńgege 15 jańa óndiristi lokalızatsııalaý jumystary júrgizilip jatyr. Atalǵan jobalardy júzege asyrý jańa jumys oryndaryn qurýdy, sondaı-aq el ishinde qosylǵan quny joǵary taýarlardy óndirý jáne olardy shyǵarý boıynsha quzyrettilikti satyp alýdy qamtamasyz etedi, – dedi Erlan Aqkenjenov.
Onyń sózine júginsek, 2022-2025 jyldar aralyǵynda Qazaqstanda 7,9 mlrd teńge somasyna 10 óndiris lokalızatsııalandy, 350-den astam jumys orny ashyldy.
Sonymen qatar halyqaralyq sertıfıkattaýdan ótý kezinde otandyq óndirýshilerdi qoldaýǵa aıryqsha mán beriledi.
– Tıisti sertıfıkattaýǵa jumsalǵan shyǵyndardy óteý shegin 3 myńnan 15 myń aılyq eseptik kórsetkishke deıin ulǵaıtý jumysy júrgizildi. Bul otandyq kásiporyndarǵa 60 mln teńgege deıingi mólsherdegi shyǵyndaryn ótep alýǵa múmkindik beredi jáne sáıkesinshe qazaqstandyq óndirýshilerge úsh iri operatordyń jetkizý tizbegine shyǵýǵa, sondaı-aq ónimderdi shetelge eksporttyq jetkizýdi júzege asyrýǵa múmkindik ashady, – dedi Erlan Aqkenjenov.
Mehanızm qazirdiń ózinde salanyń eksporttyq múmkindikterin keńeıtýge yqpal ete bastady. Mınıstrdiń sózinshe, búgingi tańda munaı-gaz sektorynda 7 otandyq taýar óndirýshiniń Eýropa, Soltústik Amerıka jáne Azııa elderine taýar eksporttaý tájirıbesi bar.
Aıta keteıik, buǵan deıin energetıkalyq sektordaǵy jer qoınaýyn paıdalanýshylardyń otandyq taýarlardy satyp alý kórsetkishi óskenin jazǵanbyz.