Elimizde munaı-gaz hımııasy salasynda bıznesti qoldaý jónindegi jumys toby quryldy
ASTANA. KAZINFORM — Qurylymnyń negizgi mindetteri — otandyq kásiporyndardyń jobalarǵa qatysý úlesin arttyrýǵa arnalǵan mehanızmderdi ázirleý, dep habarlaıdy Energetıka mınıstrligi.
Memleket basshysynyń el ishindegi qundylyqty arttyrý jáne jergilikti qamtýdy keńeıtý tapsyrmasyn iske asyrý maqsatynda, QR Energetıka mınıstrligi janynan munaı-gaz hımııasy jobalarynda otandyq kompanııalardyń qatysýyn arttyrýǵa arnalǵan arnaıy jumys toby qurylyp, óz jumysyn bastady.
Jumys tobynyń alǵashqy otyrysy búgin ótti. Onda Atyraý oblysynda polıetılen óndiretin zaýyt salý jobasy qaraldy. Aldaǵy ýaqytta gazdy bólý kesheni, býtadıen jáne karbamıd óndirý sekildi birqatar perspektıvaly joba kún tártibine engizilmek.
Jumys tobynyń quramyna salalyq memlekettik organdardyń, «QazMunaıGaz» ulttyq kompanııasynyń, sondaı-aq «Atameken» UKP, «KAZENERGY», «PetroCouncil» jáne «KazService» syndy jetekshi uıym ókilderi endi. Talqylaýǵa «Tecnicas Reunidas» jáne «Tecnimont» sııaqty halyqaralyq EPC-merdigerler de qatysady.
Qurylymnyń negizgi mindetteri — otandyq kásiporyndardyń jobalarǵa qatysý úlesin arttyrýǵa arnalǵan mehanızmderdi ázirleý, ınvestorlardyń jergilikti qamtý boıynsha mindettemeleriniń oryndalýyn baqylaý, sondaı-aq bızneske kedergi keltiretin ákimshilik jáne tehnıkalyq tosqaýyldardy joıý.
Qazirgi kezde naqty sharalar bastalyp ketti. Atap aıtqanda, «Tecnicas Reunidas»kompanııasynyń shaqyrýymen qazaqstandyq munaıservıstik kompanııalar Ispanııaǵa baryp, óndiristik nysandarmen tanysyp, ulttyq ınjenerlik áleýetti damytý joldaryn talqylady.
Otyrysta «Atameken» UKP, PetroCouncil jáne KazService ókilderi jergilikti qamtýdy arttyrý qajettigin atap ótti. Olar keıbir sheteldik qosalqy merdigerlerdiń dempıngtik baǵalar usynyp, otandyq kompanııalardyń básekege qabilettiligin tómendetip jatqanyn alǵa tartty.
QR Energetıka mınıstrligi Munaı-gaz hımııasy jáne tehnıkalyq retteý departamentiniń dırektory Temirlan Úrkimbaev vedomstvonyń ustanymy men jumys tobynyń negizgi maqsattaryn naqtylap ótti.
— Jumys tobynyń qurylýy — Memleket basshysynyń munaı-gaz hımııasyn damytý jónindegi strategııalyq tapsyrmasyn júzege asyrýǵa baǵyttalǵan naqty qadam. Basty mindetimiz — jaı dıalogpen shektelmeı, otandyq bıznesti qoldaýǵa arnalǵan shynaıy ári iske asyrylatyn sheshimderdi usyný. Mınıstrlik jergilikti qamtýdyń ósimin, ásirese «Silleno» syndy mańyzdy jobalar aıasynda, júıeli ári qatań baqylaýda ustaıtyn bolady. Biz qazaqstandyq kompanııalar iri ınvestıtsııalyq jobalarda tolyqqandy serikteske aınalýy úshin naqty jaǵdaı jasaýymyz qajet. Memlekettik organdar, ulttyq kompanııalar men bıznestiń birlesken jumysy osy maqsatqa jetýge múmkindik beredi, — dedi ol.
Bul bastamanyń basty maqsaty — jergilikti jetkizýshilerden satyp alý kólemin arttyrýmen shektelmeı, kúrdeli ınvestıtsııalyq jobalardy ózdiginen júzege asyra alatyn tolyqqandy qazaqstandyq EPC-kompanııalardy qalyptastyrý.
Buǵan deıin Energetıka mınıstrligi «Munaı-gaz hımııasy ónerkásibin damytýdyń 2024–2030 jyldarǵa arnalǵan Jol kartasyn» bekitken bolatyn. Sonymen qatar, vedomstvo «Munaı-gaz hımııasy ónerkásibi týraly» salalyq zań jobasyn aıaqtaýǵa jaqyn.
Osydan buryn Energetıka mınıstrligi benzın máselesin baqylaýda ustap otyrǵanyn málem etti.