Elimizde munaı-gaz hımııasy óz aldyna jeke sala bolyp qalyptasqan joq – Memleket basshysy

ASTANA. KAZINFORM — Elimizde munaı-gaz hımııasy óz aldyna jeke sala bolyp qalyptasqan joq. Bul týraly Úkimettiń keńeıtilgen otyrysynda Memleket basshysy Qasym-Jomart Toqaev aıtty.

- Qajetti jaǵdaı bolsa da, osy kezge deıin elimizde munaı-gaz hımııasy óz aldyna jeke sala bolyp qalyptasqan joq. Meniń tapsyrmammen polıetılen, býtadıen, karbamıd jáne basqa da ónimder shyǵaryp, osy salany jańa deńgeıge kóteretin birqatar jobalar iske qosyldy. Úkimet bul jobalardy ýaqtyly aıaqtaýǵa tıis. Osyndaı munaı-gaz hımııasy salasyndaǵy iri jobalardy iske asyrý arqyly elimizdiń negizgi hımııa ónimderine (polıetılen, polıpropılen) degen suranysyn óteımiz, - dedi Prezıdent.

Memleket basshysy ózimizde shyǵarylatyn polımerdi barynsha óńdeý isi jolǵa qoıylmaǵanyn aıtty.

- Bul materıaldan avtobólshekter, tamshylap sýarýǵa qajetti quraldar, medıtsınalyq jabdyqtar, ydys-aıaq jáne basqa da kóptegen ónim shyǵarýǵa bolady. Bul oraıda shaǵyn jáne orta bızneske qoldaý kórsetý kerek. Sonyń ishinde lızıngpen qural-jabdyq, jeńildikpen nesıe berý qajet. Bul qadam azyq-túlikten ózge ónimderdiń baǵasyn tómendetýge zor múmkindik beredi, - dedi Qasym-Jomart Toqaev.

Buǵan deıin Prezıdent memleket jeke kapıtal rólin ózine alýdan bas tartýy qajettigin aıtqan edi.