Qazaqstanda múgedektigi bar balalarǵa qandaı jaǵdaı jasalǵan

ASTANA. KAZINFORM — Elimizde 740 myńǵa jýyq múgedektigi bar adamdar turady. Olardyń 16%-y — balalar. «Búgin LIVE» baǵdarlamasynyń búgingi sanynda erekshe bilim berýdi qajet etetin balalardyń máselesi talqylandy.

— Osydan 3 jyl buryn qalamyzda erekshe bilim berýdi qajet etetin balalarǵa arnalǵan tek 6 psıhologııalyq-medıtsınalyq-pedagogıkalyq keńes berý uıymy (PMPK) jumys istese, qazir mundaı ortalyqtar sany onǵa deıin jetti. Qazir Astanada 18 jasqa deıingi erekshe bilim berýdi qajet etetin 500 myńnan astam bala bar. Sol balalarǵa 10 PMPK jumys isteıdi. Búginge deıin osy PMPK-larǵa 3 aıdan jarty jylǵa deıin kezekte turatyn bolsa, qazir ol kezek 1 kúnnen ary ketse, 1 aıǵa deıin qysqardy, — deıdi Astana qalalyq bilim basqarmasynyń basshysy.

Qalalyq bilim basqarmasy aldaǵy ýaqytta ınklıýzııany qoldaý kabınetteriniń sanyn kóbeıtýdi josparlap otyr.

— Bizdiń kelesi qadamymyz — ınklıýzııany qoldaý kabınetteriniń sanyn kóbeıtý. Oǵan qosa, eń basty maqsatymyz — shaǵyn aýdandarda turatyn balalar úshin ózi turatyn shaǵyn aýdandaǵy mektepterde de jaǵdaı jasaý. Qazir qalamyzdaǵy 100-den astam mektep bolsa, onyń 60-tan astamynda osyndaı ınklıýzııany qoldaý kabınetteri ashyldy. Jalpy qaladaǵy bilim oshaqtarynyń 95 paıyzynda ınklıýzııaǵa jaǵdaı jasalǵan. Biz bul jumystardy ári qaraı da jalǵastyramyz, — deıdi Qasymhan Senǵazyev.

Basqarma basshysy dál osy salada maman tapshylyǵy bar ekenin de jasyrmady.

— Endigi másele — mamandardy daıyndaý. Qandaı mamandar qajet? Biliktiligi qandaı? Olardyń biliktiligin qalaı arttyrý kerek? Degen sııaqty máselelerdi qazir qolǵa alyp, jumys istep jatyrmyz. Eń kóp jetispeıtin mamandar — defektolog, logoped, tıflopedagogtar. Qalamyzǵa dál osyndaı 30-ǵa jýyq maman jetispeıdi, — deıdi ol.

Odan bólek, elimizde erekshe balalarǵa kómektesetin balalardy ońaltý ortalyqtary da jumys isteıdi. Olar múgedektigi bar balalarǵa medıtsınalyq qana emes, jan-jaqty qoldaý kórsetedi.

— Bizdiń ortalyq tikeleı erekshe balalarmen jumys isteıdi. Bizden jylyna 4200-deı naýqas em alady. Aıyna 300-deı bala emdeledi. Biz 3 baǵytta jumys isteımiz. Ol — pedagogıkalyq túzetýler, medıtsınalyq kómek. Onyń ishine ártúrli fızıoterapııa, dene shynyqtyrý, medıkamentozdy terapııalar bar. Jáne áleýmettik adaptatsııa baǵyttarynda jumys isteımiz, — deıdi Ulttyq balalardy ońaltý ortalyǵy № 2 psıhonevrologııalyq bóliminiń meńgerýshisi.

Ortalyq erekshe balalardy emdeý barysynda zamanaýı ádis-tásilderdi qoldanatynyn aıtady.

— Biz shetelderge ártúrli issaparmen jıi baramyz. Salystyrmaly túrde bizdiń emdeý metodıkalarymyz zamanaýı dep aıta alamyz. Jańa emdeý tásilderin ózimizge engizemiz. Ártúrli tsıfrly, robottalǵan ádistemelerdi ortalyqta qoldanyp, ony aýmaqtarǵa taratýǵa úlesimizdi qosyp jatyrmyz, — deıdi Ǵalymjan Jylqybaev.

Eske sala keteıik, 2025 jyldyń basynan bastap Áleýmettik qyzmetter portaly arqyly múgedektigi bar adamdardyń 211,6 myń tapsyrysy oryndaldy.