Elimizde múgedektigi bar adamdarǵa arnalǵan Telegram-bot iske qosyldy
ASTANA. KAZINFORM — Týrızm jáne sport mınıstrligi Memleket basshysynyń tapsyrmasyna sáıkes Qazaqstanda parasportty damytý jáne múgedektigi bar azamattardyń sportpen shuǵyldanýyna qolaıly jaǵdaı jasaý baǵytyndaǵy jumystar jalǵasyp jatqanyn habarlady.
Endi @parasport_kz_bot Telegram-boty arqyly ár adam ózine qolaıly sport túrin tańdap, óńirindegi sport sektsııalaryn taýyp, jattyqtyrýshymen baılanysa alady. Jańa tsıfrlyq qyzmet múgedektigi bar azamattardyń sportqa qoljetimdiligin arttyryp, jattyǵýdy bastaýyna múmkindik beredi.
QR Týrızm jáne sport mınıstrliginiń Dene múmkindikteri shekteýli tulǵalarǵa arnalǵan sporttyq daıarlaý ortalyǵy adamnyń densaýlyq jaǵdaıy men turǵylyqty óńirin eskere otyryp, qoljetimdi sport túrlerin tańdaýǵa kómektesetin Telegram-botty iske qosty.
Ony paıdalaný úshin turǵylyqty óńirin, sport baǵytyn jáne densaýlyq jaǵdaıyna baılanysty shekteý sanatyn kórsetý jetkilikti. Osy málimetter negizinde bot tańdalǵan óńirde qoljetimdi sport túrleriniń tizimin usynady. Sondaı-aq WhatsApp arqyly sport uıymynyń menedjerimen habarlasýǵa, Instagram paraqshasyna ótýge jáne 2GIS qosymshasynan sport mektebiniń mekenjaıyn tabýǵa bolady.
Tsıfrlyq qyzmetterdi damytý – parasportty memlekettik qoldaýǵa baǵyttalǵan keshendi sharalardyń bir bóligi. 2025 jyly alǵash ret zańnamalyq deńgeıde I toptaǵy múgedektigi bar sportshylardy alyp júretin adamdardyń mártebesi bekitilip, olardyń halyqaralyq jarystarǵa qatysýyn qarjylandyrý kózdeldi.
Qazaqstandyq parasportshylardyń jetistikteri júıeli qoldaýdyń nátıjesin kórsetip otyr. 2026 jyly ótken V Azııa Para oıyndarynda Qazaqstan quramasy 12 altyn, 16 kúmis jáne 22 qola medal jeńip alyp, jalpykomandalyq esepte toǵyzynshy orynǵa turaqtady. Osylaısha ulttyq qurama 2023 jylǵy oıyndarda qol jetkizgen nátıjesin jaqsartty. Ol kezde qazaqstandyq parasportshylar segiz altyn medal ıelengen bolatyn.
Taǵy bir aıtýly jetistik – Erbol Hamıtovtyń 2026 jyly Italııada ótken qysqy Paralımpıada oıyndaryndaǵy jeńisi. Ol parabıatlonnan altyn, al parashańǵy jarysynan qola medal jeńip aldy. Sonymen qatar Tokıoda ótken XXV jazǵy Sýrdlımpıada oıyndarynda Qazaqstan quramasy segiz altyn, tórt kúmis jáne 13 qola medalǵa qol jetkizip, el qorjynyna barlyǵy 25 júlde saldy.
Joǵary jetistikter sportymen qatar, múgedektigi bar azamattardy dene shynyqtyrýmen jáne sportpen turaqty aınalysýǵa tartýǵa erekshe kóńil bólinýde. Búginde Qazaqstanda 66 myńnan astam múgedektigi bar adam sportpen turaqty túrde shuǵyldanady. Elimizde paralımpıadalyq, sýrdlımpıadalyq jáne paralımpıadalyq baǵdarlamaǵa kirmeıtin sport túrlerin qosa alǵanda, 35 sport túri damyp keledi.
Múgedektigi bar adamdarǵa arnalǵan sportty damytý tek halyqaralyq jarystardaǵy jetistiktermen shektelmeıdi. Sportpen júıeli aınalysý densaýlyqty nyǵaıtýǵa, qoǵam ómirine belsendi aralasýǵa, qarym-qatynas aıasyn keńeıtýge jáne ómir sapasyn jaqsartýǵa yqpal etedi. Al qoljetimdi sporttyq orta qalyptastyrý jańa talanttardy anyqtaýǵa jáne elimizdiń sporttyq rezervin tolyqtyrýǵa jol ashady.
Telegram-bottyń iske qosylýy – osy baǵyttaǵy jumystyń kezekti qadamy. Jańa qyzmet sportpen aınalysýǵa nıetti azamattarǵa qajetti aqparatty bir jerden alýǵa, ózine qolaıly sektsııany jyldam tabýǵa jáne sport uıymymen tikeleı baılanysýǵa múmkindik beredi.
Telegram-botqa silteme: https://t.me/parasport_kz_bot
