Elimizde múgedek jandardyń 58% eńbekke jaramdy

ASTANA. KAZINFORM – Qazaqstanda múgedek jandardyń múddesin tolyqqandy qorǵaýǵa qatysty birqatar sheshimin tappaǵan másele bar. Bul týraly Eńbek jáne halyqty áleýmettik qoldaý mınıstri Svetlana Jaqypova málim etti.

«Búginde elimizde 725 myńnan astam múgedek jan bar, onyń 58%-y eńbekke jaramdy, 26,9%-y zeınet jasynda jáne 15,1%-y balalar men jasóspirimder. Erekshe jandardy áleýmettik oqshaýlaý, kemsitýshilik, ınfraqurylymnyń tıisti deńgeıde qoljetimsizdigi, eńbek naryǵyndaǵy teń emes múmkindikter, arnaýly áleýmettik qyzmetterdiń sapasynyń tómendigi jáne basqa da máseleler áli de ózekti bolyp otyr. Olardy sheshý úshin memleket júıeli sharalardy atqaryp jatyr», – dedi Svetlana Jaqypova Ortalyq kommýnıkatsııalar qyzmeti alańynda ótken baspasóz máslıhatynda.

Sondaı-aq, mınıstr Qazaqstanda 2025 jylǵa deıin múgedektigi bar jandardyń quqyǵyn qamtamasyz etý jáne ómir súrý sapasyn jaqsartý jónindegi ulttyq jospar iske asyrylyp jatqanyn eske saldy.

«Áleýmettik kodeks sheńberinde múgedektigi bar jandardy áleýmettik qorǵaýdyń kóp deńgeıli júıesi engizildi. Onyń ishinde, memlekettik kómek jáne járdemaqylar men áleýmettik tólemder, áleýmettik ońaltý, arnaýly áleýmettik qyzmetter, jumysqa ornalastyrý taǵy sol sııaqty qoldaý túrleri bar», - deıdi vedomstvo basshysy.