Elimizde muǵalimder jetkilikti me
ASTANA. KAZINFORM — Elimizdiń óńirlerinde muǵalim tapshylyǵy áli de bar ma? Qaı pánder boıynsha muǵalimder jetispeıdi? Bul suraqtarǵa Oqý-aǵartý mınıstrligi jaýap berdi.
— 2025 jylǵy 1 aqpandaǵy jaǵdaı boıynsha memlekettik bilim berý uıymdarynda eki myńnan astam bos vakansııa bar. Atap aıtsaq, matematıka, fızıka pánderi jáne bastaýysh synyp muǵalimderi boıynsha bos oryndar tirkelgen. Qalyptasqan bos oryndarǵa ýaqytyly konkýrs jarııalanady, onyń tártibi tıisti qaǵıdalarmen aıqyndalǵan. Konkýrs nátıjesi shyqqanǵa deıin oqý júktemesi pán muǵalimderi arasynda bólinedi. Pedagogıkalyq kadrlarǵa qajettilik joq. Bos jumys oryndarynyń negizgi sebepteri — turǵylyqty jerin aýystyrý, basqa jumysqa aýysý, zeınetkerlik jasqa jetý, dekrettik demalysqa shyǵý, merzimdi áskerı qyzmet, oqý jáne sheteldik taǵylymdamalar, magıstratýra men doktarantýraǵa oqýǵa túsý, jańa mektepterdiń ashylýy, — delingen mınıstrliktiń Kazinform agenttigine bergen jaýabynda.
Sońǵy bes jylda pedagogıkalyq baǵyttar boıynsha joǵary jáne joǵary oqý ornynan keıingi bilim berý uıymdary túlekteriniń sany jyl saıyn shamamen 50 myń adam bolyp otyr. Eńbek naryǵynda pedagogıkalyq mamandar jetkilikti usynylǵan. Sonymen qatar, pedagogıkalyq mamandyqtar boıynsha granttar sany jyldan-jylǵa artyp keledi. Máselen, 2022 jyly — 15 273 grant, 2023 jyly — 15 923, al 2024 jyly 15 973 grant bólindi.
Munymen qosa, jergilikti atqarýshy organdar tarapynan pedagog mamandardy daıarlaýǵa arnalǵan bilim berý granttary jyl saıyn artyp keledi.
— Qazirgi kezde daryndy jastar arasynan pedagogıkalyq mamandyqtarǵa túsetinderdiń sany artyp keledi. 2023 jyly «Altyn belgi» tósbelgisiniń ıegerlerine 1 528 grant, 2024 jyly 1 797 grant berildi. Sonymen qatar, pedagogıkalyq bilimi joq adamdar úshin joǵary oqý oryndarynda pedagogıkalyq qaıta daıarlaýdan kýrstar ótip, bilim berý uıymdaryna jumysqa ornalasady. Jas muǵalimderdi bilim berý uıymdaryna jumysqa tartý úshin «Dıplommen aýylǵa» arnaıy baǵdarlamasy júzege asyrylyp otyr. 2021 jyldan bastap muǵalimderdi jumysqa qabyldaý konkýrstyq negizde júzege asyrylady, — dep atalyp ótken vedomstvo aqparatynda.
Aıta keteıik, 2024 jyly tamyz aıynyń aıaǵynda Qazaqstan mektepterinde 398 854 pedagog jumys istep jatqany habarlandy.
Buǵan deıin «Altyn belgi» ıegerleri pedagogıka mamandyqtaryn jıi tańdaı bastaǵanyn jazǵan edik.