Elimizde MMA-men qansha adam aınalysady
ASTANA. KAZINFORM – Qazaqstannyń MMA ulttyq qurama komandasy Azııada 1-oryndy jáne IMMAF-te 3-oryndy ıelenedi. Bul týraly Májilis depýtattarynyń saýalyna Premer-Mınıstr Oljas Bektenovtiń jaýabynda aıtylǵan.
«Elimizde 2013 jyldan bastap MMA-ny resmı damytýdy akkredıttelgen Qazaqstandyq MMA aralas jaýyngerlik jekpe-jegi boıynsha birikken federatsııasy (budan ári – MMA federatsııasy) júzege asyrady. 2019 jyly sport túrleriniń tizimine «kásibı MMA» sport túri engizildi. Qazaqstanda 4 halyqaralyq klýb (Alash Pride, OCTAGON PROMOTION, Naiza Fighting Championship, Erkin kúsh) qyzmetin júzege asyrady. Bul klýbtar jeke zańdy tulǵalar sanalady jáne jeke qarajat esebinen qarjylandyrylady. Búgingi kúni elimizde 23 myńnan astam adam shuǵyldanatyn 592 sektsııa jumys isteıdi. Olardy daıarlaýmen 193 jattyqtyrýshy aınalysady. Óńirlerde akkredıttelgen MMA federatsııalary qyzmet atqarady. Sonymen qatar oblystyq joǵary sport sheberligi jáne balalar-jasóspirimder sport mektepterinde 13 MMA bólimsheleri (Abaı, Atyraý, Almaty, Jambyl, Batys Qazaqstan, Qaraǵandy, Soltústik Qazaqstan, Túrkistan oblystary jáne Shymkent q.) ashyldy», - dedi Oljas Bektenov jaýabynda.
Onyń atap ótýinshe, oqý-jattyǵý jıyndary, Qazaqstan Respýblıkasynyń chempıonattary, kýboktary turaqty túrde ótkiziledi. Barlyǵy 94 sportshydan quralǵan ulttyq qurama komandalary (onyń ishinde jasóspirimder – 30 adam, jastar – 32 adam, eresekter – 32 adam) jyl saıyn álem jáne Azııa chempıonattaryna qatysady.
«Búgingi tańda MMA ulttyq qurama komandasy Azııada 1-oryndy jáne IMMAF-Halyqaralyq aralas jaýyngerlik óner federatsııasynyń halyqaralyq uıymyna múshe 130 eldiń ishinde álemde 3-oryndy ıelenedi. Qazirgi ýaqytta Memleket basshysynyń tapsyrmasy aıasynda Parlament Májilisiniń qaraýyndaǵy Zań jobasy aıasynda memlekettik bıýdjet qarajaty esebinen qarjylandyrylatyn sport túrlerin qysqartý josparlanýda. Onda respýblıkalyq bıýdjet qarajaty esebinen tek ulttyq sport túrlerin, Olımpıadalyq, Paralımpıadalyq, Sýrdlımpıadalyq, Azııalyq, Azııa Para oıyndarynyń baǵdarlamalaryna engizilgen jáne joǵary sporttyq nátıjeleri bar sport túrlerin qarjylandyrý josparlanýda. Baıandalǵannyń negizinde bul sport túrin damytý jumystaryn MMA federatsııasy jalǵastyratyn bolady», - dedi Úkimet basshysy.
