Elimizde merekelerde otshashýǵa tyıym salynýy múmkin be

ASTANA. KAZINFORM – Elimizde aıtýly mereke kúnderi qala ortalyqtarynda otshashý atylady. Ádette, merekelik feıerverkterdiń jarqyraýyn tamashalaýǵa jurt kóp jınalady. Al ekolog mamandar otshashýdyń (feıerverk) qorshaǵan ortaǵa zalalyn aıtyp alańdap otyr. Osy oraıda Ekologııa jáne tabıǵı resýrstar mınıstrliginiń ustanymyn bilgen edik.

Vedomstvonyń resmı saýalǵa berilgen jaýabynda ázirge otshashýdy tolyqtaı zańnamalyq turǵydan tyıym salý máselesi qarastyrylmaǵany aıtylǵan.

- Qazir tyıym salý týraly usynystar túsken joq, alaıda mınıstrlikke usynystar túsken jaǵdaıda, quzyretti memlekettik organdarmen birlesip talqylaýǵa daıyn, - degen jaýap aldyq.

Feıerverk basqa da qorshaǵan orta men adam densaýlyǵyna zardaby bar buıym, suıyqtyq, qaldyq máselesi Ekologııa kodeksi 1-babynyń 3-tarmaqshasyna sáıkes qorshaǵan ortany qorǵaý salasynda týyndaıtyn qoǵamdyq qatynastar, sondaı-aq halyqtyń sanıtarııalyq-epıdemıologııalyq salamattylyǵyn qamtamasyz etý úshin qajetti jáne kodekske qaıshy kelmeıtin shamada Qazaqstan Respýblıkasynyń densaýlyq saqtaý salasyndaǵy zańnamamen retteledi.

Sonymen qatar mınıstrlik elimizde otshashýdyń qorshaǵan ortaǵa jáne adam densaýlyǵyna yqtımal áserin zertteý jumystary júrgizilmegenin habarlap otyr.

- Mınıstrlik ekologııalyq uıymdar men qoǵam belsendileriniń usynystaryn qoldaıdy jáne olardy qarastyrýǵa árqashan ashyq. Ekologterdiń ýájderi ǵylymı derekterge súıengendikten, bul pikirler mınıstrliktiń qorshaǵan ortany qorǵaý saıasatyn qalyptastyrý barysynda eskeriledi,- delingen habarlamada.

Eske sala ketsek, Almatyda otshashýǵa tyıym salý máselesi josparlanyp jatyr. 

Aıta keteıik, bıyl elordada Jeńis kúnine jáne qala kúnine oraı otshashý boldy.