Elimizde memlekettik-jekeshelik áriptestik aıasynda alǵashqy sport nysanynyń qurylysy bastaldy
ASTANA. KAZINFORM - Atyraý oblysynda memlekettik-jekemenshik áriptestik (MJÁ) tetigi arqyly salynatyn alǵashqy sport nysanynyń qurylysy bastaldy, dep habarlaıdy QR Týrızm jáne sport mınıstrliginiń baspasóz qyzmeti.
Bul – Atyraý qalasynda daryndy balalarǵa arnalǵan oblystyq sport mektep-ınternat-kolledji. Nysandy paıdalanýǵa berý 2027 jyldyń mamyr aıyna josparlanǵan.
MJÁ mehanızmine sáıkes, jeke áriptes jobalaýdan bastap qurylysqa deıingi jumystardy jáne nysandy paıdalanýǵa berilgennen keıingi 5 jyl boıy ony kútip-ustaý qyzmetterin júzege asyrady.
Jobanyń basty ereksheligi – tolyqqandy kópfýnktsıonaldy sporttyq-bilim berý kesheniniń salynýy. Munda zamanaýı oqý ǵımarattary men jaıly jataqhana qarastyrylǵan. 3,2 gektar aýmaqta 400 oryndyq oqý blogy, 300 oryndyq jataqhana, 13 sport zaly, basseın, ashana, kitaphana, stadıon, júgirý jolaqtary, sondaı-aq basketbol jáne voleıbol alańdary boı kóteredi.
Qazirgi tańda elde 16 oblystyq mamandandyrylǵan mektep-ınternat jáne 4 respýblıkalyq mektep-kolledj-ınternat jumys isteıdi, onda 6 431 sportshy bilim alady. Alaıda Astana jáne Shymkent qalalarynda, sondaı-aq Abaı, Ulytaý jáne Qostanaı oblystarynda mundaı mekemeler joq. Sondyqtan Atyraý oblysyndaǵy bul joba pılottyq rejımde iske asyrylyp, keıinnen ózge óńirlerge de keńeıtý josparlanyp otyr.
Jańa keshende 13 olımpıadalyq sport túri boıynsha 400 sportshyny (300 oqýshy jáne 100 kolledj stýdenti) daıarlaý kózdelgen. Olardyń barlyǵy Atyraý oblystyq sport ınternatynyń tárbıelenýshileri bolady.
-Mektep-ınternat-kolledjiniń qurylysy sport rezervin daıarlaýǵa qolaıly jaǵdaı jasap, oqý men jattyǵýdy tıimdi ushtastyrýǵa múmkindik beredi. Sonymen qatar elimizde balalar men jasóspirimder sportyn damytýǵa aıtarlyqtaı serpin beredi,-delingen habarlamada.
Osyǵan deıin Atyraý oblysynda 12 myń oryndyq stadıonnyń qurylysy bastalatyny týraly jazdyq.
