Málimetterdi zańsyz jarııalaǵan HQKO mamandary memlekettik qyzmetshiler sekildi jazalanady
Búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine Memlekettik korporatsııa máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaıdy QazAqparat tilshisi.
Zań jobasy memlekettik qyzmetterdi kórsetýdi ońtaılandyrý jáne «Azamattarǵa arnalǵan úkimet» memlekettik korporatsııasynyń jumysyn jetildirý maqsatynda Parlament Májilisiniń depýtattarynyń bastamasymen daıyndaldy.
«Zań jobasynda memlekettik qyzmetterdi tikeleı kórsetetin jáne derbes derekterdi qaraı alatyn memlekettik korporatsııa qyzmetkerlerin memlekettik fýnktsııalardy oryndaýǵa ýákilettik berilgen adamdarǵa teńestirilgen sanatqa jatqyzý eskerilgen. Bul turǵyda Qylmystyq kodekske jáne «Sybaılas jemqorlyqqa qarsy is-qımyl týraly» Zańǵa ózgerister engizilip jatyr. Bul túzetýler Memlekettik korporatsııa qyzmetkerleriniń qyzmetin teris paıdalanýyna jol bermeýge, azamattardyń quqyqtaryn qorǵaýǵa baǵyttalǵan», - dedi depýtat Danabek Isabekov.
Onyń aıtýynsha, qoldanystaǵy zańnama aıasynda zań buzý derekteri anyqtalǵan jaǵdaıda, Memlekettik korporatsııanyń osy qyzmetkerleri memlekettik fýnktsııalardy oryndaýǵa ýákilettik berilgenderge teńestirilgen qyzmetker retinde jaýapty bolady.
Sonymen qatar, «Azamattarǵa arnalǵan úkimet» memlekettik korporatsııasy» uǵymyn naqtylaý qarastyrylǵan.
«Bul biryńǵaı provaıder arqyly kórsetiletin qyzmet túrlerin ulǵaıtý boıynsha úzdiksiz jumys isteýge múmkindik beredi. Memlekettik korporatsııaǵa aqparattyq júıe aıasynda ótinishterdi qabyldaýdy uıymdastyrý quzyretin berý eskerilgen. Bul norma azamattarǵa ákimshilik organdarǵa júginýge, jaýap alýǵa, sondaı-aq ótinishterdi qaraý sapasyn baqylaýǵa múmkindik beretin pılottyq rejımde tekserilgen júıeni («E-Ótinish») paıdalanýdy zańnamalyq turǵydan bekitedi», - dedi depýtat.
