Elimizde memlekettik ınvestıtsııalyq jobalardy iske asyrý qaǵıdalaryna ózgerister engiziledi
ASTANA. KAZINFORM – Qazaqstannyń Ulttyq ekonomıka mınıstrligi memlekettik ınvestıtsııalyq jobalardy josparlaý jáne iske asyrý qaǵıdalaryna ózgerister men tolyqtyrýlar engizý týraly buıryq jobasyn qoǵamdyq talqylaýǵa usyndy.
Qujattyń negizgi maqsaty – ınvestıtsııalyq ahýaldy jaqsartý jáne iri jobalardy júzege asyrý úshin halyqaralyq qarjy uıymdarynyń qarajatyn tartý.
«Ashyq NQA» portalynda jarııalanǵan málimetke sáıkes, usynylyp otyrǵan ózgerister halyqaralyq qarjy uıymdary qarjy bóletin memlekettik ınvestıtsııalyq jobalardy qaraý rásimderin jetildirýge, ońtaılandyrýǵa jáne barlyq kezeńderdegi kelisý merzimderin qysqartýǵa baǵyttalǵan.
Atap aıtqanda, syrtqy qaryz esebinen qarjylandyrylatyn ınvestıtsııalyq usynystardy qaraý merzimin 20 jumys kúninen 12 jumys kúnine deıin qysqartý kózdelip otyr. Qujat qaıta usynylǵan jaǵdaıda bul merzim 8 jumys kúnine deıin qysqarady. Sondaı-aq mundaı jobalardyń tehnıkalyq-ekonomıkalyq negizdemesine júrgiziletin ekonomıkalyq saraptama merzimi 26 jumys kúninen 20 jumys kúnine, al qaıta qaraý kezinde 15 jumys kúnine deıin azaıtylmaq.
Budan bólek, oń ekonomıkalyq qorytyndy alynǵannan keıin jobany qarjylandyrýǵa arnalǵan bıýdjettik ótinimdi usyný merzimi 10 jumys kúninde bitýi kerek. Dál osyndaı ýaqyt ishinde qorytyndy ázirlenip, materıaldar bıýdjettik komıssııanyń qaraýyna engizilýi tıis.
Bul sharalar memlekettik ınvestıtsııalyq jobalardy irikteý men júzege asyrýdy jedeldetip, olardyń ashyqtyǵy men tıimdiligin arttyrady. Sonymen qatar jańa jobalar sanyn kóbeıtip, eldiń ınvestıtsııalyq tartymdylyǵyn kúsheıtedi.
Atalǵan qujat jobasyn qoǵamdyq talqylaý 2026 jylǵy 14 mamyrǵa deıin jalǵasady.
Aıta keteıik, «Ashyq NQA» portalynda Kólik mınıstrliginde kútý aımaqtarynyń ınfraqurylym parametrlerin, jol qozǵalysyn uıymdastyrý tártibin jáne tehnıkalyq jabdyqtalý deńgeıin egjeı-tegjeıli retteıtin qujat qaralyp jatyr.
