Elimizde mektep medıtsınasy tsıfrlandyrylady
ASTANA. KAZINFORM – Qazaqstanda mektep medıtsınasynyń jańa modelin engizý josparlanyp otyr. Oqýshylardy profılaktıkalyq tekserý kezinde tsıfrlyq dıagnostıkalyq jabdyqtar qoldanylyp, nátıjeleri medıtsınalyq aqparattyq júıelerde tirkeledi, dep habarlaıdy Densaýlyq saqtaý mınıstrligi.
6-7 tamyzda mınıstrlik Mańǵystaý jáne Atyraý oblystarynda mektep medıtsınasynyń damýyna arnalǵan kóshpeli keńester ótkizdi. Oǵan densaýlyq saqtaý basqarmalarynyń, medıtsınalyq-sanıtarııalyq alǵashqy kómek uıymdarynyń ókilderi, mektep medıtsınasy qyzmetkerleri men beıindi mamandardy qosa alǵanda 400-den astam adam qatysty.
Jańa modeldiń negizgi baǵyttarynyń biri – mektep oqýshylaryn profılaktıkalyq tekserýdi tsıfrlandyrý.
– Tekserý júrgizý kezinde zamanaýı tsıfrlyq dıagnostıkalyq qurylǵylardy paıdalaný, al alynǵan nátıjelerdi aqparattyq júıelerde avtomatty túrde tirkeý josparlanýda. Bul balanyń densaýlyq jaǵdaıy týraly neǵurlym tolyq málimet qalyptastyrýǵa jáne onyń ózgeristerin dınamıkada baqylaýǵa múmkindik beredi, – delingen mınıstrlik habarlamasynda.
Eger oqýshydan belgili bir qaýip faktorlary nemese densaýlyq kórsetkishterindegi ózgerister anyqtalsa, málimetter odan ári baqylaý, qosymsha tekserý nemese medıtsınalyq kómek kórsetý úshin MSAK mamandaryna jedel joldanady.
Osylaısha mektep medıtsınasy bir rettik profılaktıkalyq tekserýden balanyń densaýlyǵyn júıeli tsıfrlyq baqylaýǵa kezeń-kezeńimen kóshedi.
Jańa modelde aýrýlardyń aldyn alý men densaýlyqtaǵy ózgeristerdi erte anyqtaýǵa basymdyq beriledi. Mektep medıtsınasy qyzmetkerleriniń mindeti medıtsınalyq tekserýmen ǵana shektelmeıdi. Olar aýrýlardyń aldyn alý, sanıtarııalyq-aǵartý jumystaryn júrgizý, balalar arasynda salaýatty ómir saltyn qalyptastyrý jáne MSAK uıymdarymen ózara is-qımyl jasaýǵa qatysady.
Kóshpeli keńester barysynda oqýshylar arasynda salaýatty ómir saltynyń turaqty daǵdylaryn qalyptastyrýǵa jáne profılaktıkalyq mádenıetti damytýǵa baǵyttalǵan «Salamatty mektep» jobasy da tanystyryldy.
– Jańa model mektep medıtsınasynyń zamanaýı, tsıfrlyq jáne profılaktıkalyq sıpatyn kúsheıtýge baǵyttalǵan. Bul balanyń densaýlyq jaǵdaıyn belgili bir ýaqyttaǵy kórsetkish boıynsha ǵana baǵalap qoımaı, onyń ózgeristerin dınamıkada turaqty baqylaýǵa múmkindik beredi, – dep atap ótti vedomstvodan.
Sonymen birge mektep medıtsınasynyń mamandarmen qamtamasyz etilýi, tsıfrlyq ınfraqurylymdy damytý jáne medıtsınalyq uıymdardyń jańa tásilderdi engizýge daıyndyǵy talqylandy.
Mańǵystaý jáne Atyraý oblystarynda ótken keńester óńirlerdiń jańa modeldi is júzinde engizýge daıyndyǵyn baǵalaýǵa jáne mektep medıtsınasyn damytý boıynsha aldaǵy qadamdardy aıqyndaýǵa múmkindik berdi.
Aıta keteıik, Atyraýda balalarǵa kohlearlyq ımplantattaý operatsııasy jasalmaq.
