Elimizde medıtsınalyq týrızm damyp keledi: bes aıda 500 sheteldik emdeldi
ASTANA. KAZINFORM- Qazaqstan joǵary tehnologııalyq medıtsınalyq kómek, bilikti mamandar men keshendi qyzmet kórsetý arqyly medıtsınalyq týrızm naryǵyndaǵy óz áleýetin nyǵaıtyp keledi. Osy baǵyttyń damýyna eleýli úles qosyp otyrǵan mekemelerdiń biri – jyl saıyn shetelden myńdaǵan patsıent qabyldaıtyn QR PІB Medıtsınalyq ortalyǵy.
2026 jyldyń alǵashqy bes aıynyń qorytyndysy boıynsha Ulttyq gospıtal 400-ge jýyq patsıentke medıtsınalyq kómek kórsetti. Olardyń basym bóligi Reseı, Qyrǵyzstan, Ózbekstan, AQSh jáne Qytaı elderinen kelgen. Eń suranysqa ıe baǵyttar qatarynda neırohırýrgııa men nevrologııa, kardıologııa, ýrologııa, terapııa jáne stomatologııa bar.
Medıtsınalyq ortalyq aýrýhanasyna da shetel azamattarynyń qyzyǵýshylyǵy joǵary.
2025 jyly munda 900-den astam medıtsınalyq týrıst em qabyldasa, bıylǵy jyldyń alǵashqy bes aıynda olardyń sany 500-den asty.
Patsıentter sany boıynsha kósh bastap turǵan elder – Reseı, AQSh, Qytaı, Tájikstan, Germanııa men Ulybrıtanııa. Sonymen qatar Italııa, Frantsııa, Bolgarııa, Aýstralııa jáne basqa da memleketterdiń azamattary medıtsınalyq kómekke júgingen.
Eń suranysqa ıe baǵyttar qatarynda kardıohırýrgııa, otorınolarıngologııa, neırohırýrgııa, travmatologııa, sondaı-aq keshendi check-up pen dıagnostıkalyq baǵdarlamalar bar.
Medıtsınalyq týrızmniń damýyna medıtsınalyq qyzmetterdiń joǵary sapasy ǵana emes, sheteldik patsıentter úshin qolaıly jaǵdaılardyń jasalýy da yqpal etip otyr. Olar úshin vıza men qajetti qujattardy rásimdeýge kómek kórsetý, transfer uıymdastyrý, qonaqúı brondaý, emdeýdiń barlyq kezeńinde súıemeldeý jáne aqparattyq qoldaýdy qamtıtyn arnaıy qyzmet kórsetý paketteri ázirlengen.
Sarapshylardyń pikirinshe, emdeý nátıjeleriniń joǵary tıimdiligi men zamanaýı medıtsınalyq tehnologııalardyń keńinen engizilýi Qazaqstannyń joǵary tehnologııalyq medıtsına ortalyǵy retindegi oń ımıdjin qalyptastyrýǵa yqpal etip otyr. Sonymen qatar Medıtsınalyq ortalyq mamandarynyń halyqaralyq kórmelerge, ǵylymı konferentsııalarǵa jáne kásibı qaýymdastyqtardyń jumysyna belsendi qatysýy otandyq densaýlyq saqtaý júıesiniń áleýetin halyqaralyq deńgeıde tanytýǵa múmkindik beredi.
-Sheteldik patsıentter sanynyń artýy qazaqstandyq medıtsınaǵa degen senimniń kúsheıip kele jatqanyn kórsetedi. Medıtsınalyq týrızm densaýlyq saqtaý salasyn damytýdyń mańyzdy baǵytyna aınalyp qana qoımaı, elimizdiń halyqaralyq bedelin nyǵaıtýǵa da úles qosyp otyr. Bul óz kezeginde Qazaqstanǵa em izdep keletin sheteldik azamattar sanynyń odan ári artýyna áser etedi,-delingen habarlamada.
Osyǵan deıin habarlaǵanymyzdaı, densaýlyq saqtaý mınıstrligi telemedıtsınalyq qyzmetterdi damytýǵa jańa standarttar engizdi.
