Elimizde medıtsınalyq-áleýmettik saraptamadan ótý úshin elektrondy kezek engizilip jatyr
ASTANA. KAZINFORM — Eńbek jáne halyqty áleýmettik qorǵaý mınıstrligi áleýmettik saladaǵy memlekettik qyzmetterdi tsıfrlandyrý jáne olardy azamattarǵa yńǵaıly etý jumystaryn jalǵastyryp jatqanyn habarlady.
Osy maqsatta medıtsınalyq-áleýmettik saraptamadan (MÁS) júzbe-júz ótý úshin elektrondy kezek engizilip jatyr.
Jańa servıs azamattarǵa qabyldaýǵa aldyn ala jazylyp, ózine yńǵaıly kún men ýaqytty tańdaýǵa múmkindik beredi. Bul rette kezekte uzaq ýaqyt kútýdiń qajeti joq. Elektrondy kezek jobasy aldymen Aqmola oblysynda iske qosyldy. Keıin bul servıs Almaty qalasynda da engizildi.
2026 jyldyń 1 qazandaǵy jaǵdaı boıynsha elektrondy kezekti Aqmola oblysynda 2 580 adam, al Almaty qalasynda 3 030 adam paıdalanǵan. Elektrondy kezekke Áleýmettik qyzmetter portaly (aleumet.egov.kz) arqyly jazylýǵa bolady.
Ol úshin birneshe qarapaıym qadamdy oryndaý qajet. Azamat elektrondyq tsıfrlyq qoltańbasy arqyly Áleýmettik qyzmetter portalyna kirip, Jeke kabınetten «Kýálandyrýǵa jazylý» qyzmetin tańdaýy kerek. Odan keıin ózine yńǵaıly kún men ýaqytty belgileıdi.
Júıe azamattyń turǵylyqty jerine qaraı tıisti medıtsınalyq-áleýmettik saraptama bólimin avtomatty túrde anyqtaıdy. Jazylý sátti aıaqtalǵannan keıin azamattyń telefon nómirine MÁS-ten ótetin kún men ýaqyt, bólimniń mekenjaıy jáne talon nómiri kórsetilgen SMS-habarlama keledi. Belgilengen qabyldaýǵa úsh kún qalǵanda júıe qosymsha SMS arqyly eske salady.
Qajet bolǵan jaǵdaıda azamat Jeke kabıneti arqyly jazylýyn toqtata alady nemese basqa kún men ýaqytqa aýystyrady. Eger azamat belgilengen ýaqytta kelmese, kezek avtomatty túrde joıylady. Bul týraly da tıisti habarlama jiberiledi. Elektrondy kezek júıesi medıtsınalyq-áleýmettik saraptamadan ótýdi jeńildetip, azamattardyń kútý ýaqytyn qysqartýǵa jáne qabyldaýdy tıimdi uıymdastyrýǵa múmkindik beredi.
Joba eki óńirde iske asyrylǵannan keıin onyń nátıjeleri saralanyp, elektrondy kezekti elimizdiń barlyq óńirine engizý máselesi qaralmaq.
Qazaqstanda 8 mln-nan astam medıtsınalyq anyqtama elektrondy túrde rásimdelgenin jazǵan edik.
