Dárigerler qateligi úshin shyǵyndy óz qaltasynan tólemeıdi – mınıstr

ASTANA. KAZINFORM – Medıtsına qyzmetkerleriniń kásiptik jaýapkershiligi qalaı saqtandyrylady? Dáriger qatelesip patsıenttiń densaýlyǵyna zalal keltirse, shyǵyndy kim óteıdi? Bul saýalǵa Densaýlyq saqtaý mınıstri Aqmaral Álnazarova jaýap berdi. 

«Burynǵy zańda medıtsına qyzmetkerleriniń kásiptik jaýapkershiligin saqtandyrý máselesi qarastyrylmaǵan edi. Dáriger patsıenttiń densaýlyǵyna túrli zalal keltirip, onyń qateligi dáleldengen jaǵdaıda, onyń ústinen qylmystyq is qozǵalatyn. Bul jaǵdaıda dárigerler patsıenttiń densaýlyǵyna keltirgen zalaly úshin materıaldyq jáne moraldyq shyǵynda óz qaltasynan ótep keldi. Bıyldan bastap Prezıdenttiń tapsyrmasymen alǵash medıtsına qyzmetkerleriniń kásiptik jaýapkershiligin saqtandyrýdy engizilip otyr», - dep jaýap berdi Aqmaral Álnazarova Úkimet otyrysynan keıin ótken baspasóz máslıhatynda.

Mınıstrdiń aıtýynsha, endigi ýaqytta patsıent pen dárigerdiń arasynda daý-damaı týyndaǵan jaǵdaıda isti sotqa jetkizbeı qaralady. Máseleni qaraý úsh deńgeıden turady, aldymen medıtsınalyq mekeme ishinde qarastyrýy, ekinshi densaýlyq saqtaý basqarmasy deńgeıinde, másele oń sheshimin tappaǵan jaǵdaıda medıtsınalyq jáne farmatsevtıkalyq baqylaý komıteti deńgeıinde qarastyrylady. 

«Úsh deńgeıli qaraýdyń nátıjesinde dárigerdiń qateligi dáleldengen jaǵdaıda patsıentke nemese onyń jaqyndaryna zalal shyǵyny saqtandyrý jarna esebinen óteledi, osylaısha dárigerdi jumys berýshi saqtandyrady. Ol úshin jyl saıyn medıtsına qyzmetkerlerine jumys berýshilerge saqtandyrý jarnasy bólinedi», - deıdi vedomstvo basshysy. 

Aıta ketsek, keshe elimizde medıtsına qyzmetkerleriniń kásiptik jaýapkershiligin saqtandyrý týraly zań kúshine endi.