Elimizde medıatorlardy oqytý baǵdarlamalarynyń tizimi bekitildi

ASTANA. KAZINFORM – Astanada Qazaqstan Respýblıkasy Mádenıet jáne aqparat mınıstrligi janynan qurylǵan medıatorlar uıymdarymen ózara is-qımyl jónindegi Úılestirý keńesiniń otyrysy ótti.

Jıynǵa Keńes músheleri men ýákiletti organǵa qarasty medıatorlar uıymdarynyń ókilderi qatysty. Otyrysta jańa Konstıtýtsııa jobasy talqylandy. Qatysýshylar Ata zańnyń jańartylǵan normalary qoǵamdaǵy mańyzdy suranystarǵa jaýap berip, turaqty damýdyń ınstıtýtsıonaldyq negizin qalyptastyratynyn atap ótti.

Sonymen qatar medıatorlardy daıarlaý jáne oqytý máselelerine erekshe nazar aýdaryldy. Jańartylǵan qaǵıdalarǵa sáıkes, oqytý quqyǵy tek Úılestirý keńesi maquldaǵan oqý baǵdarlamalary bar uıymdarǵa ǵana beriledi.

Aıta ketsek, jıynda 11 medıatorlar uıymynyń oqý baǵdarlamalary bekitildi. Olardyń qatarynda Halyqaralyq quqyq qorǵaý ortalyǵy, Halyqaralyq medıatsııa ortalyǵy, «Alıans Ýspeha», «Parasat» medıatorlar men zańgerler qaýymdastyǵy, «Pactum» medıatsııa jáne kelissózder ortalyǵy, «Tatulas» medıatsııa ortalyǵy, QR Medıatorlar qaýymdastyǵy, Qaraǵandy oblysynyń kásibı medıatorlar qaýymdastyǵy, «Adam jáne Quqyq» medıatorlar men zańgerler odaǵy, «Sodeıstvıe ı pravo» quqyqtyq kómek jáne medıatsııa ortalyǵy, sondaı-aq International bureau of mediation uıymdary bar.

Buǵan deıin Qazaqstan óz azamattaryn shetelde oqytý kórsetkishi boıynsha 9-orynda turǵanyn jazǵanbyz.