Elimizde máıit donorlyǵy arqyly balalarǵa transplantatsııa jasaý kózdelip otyr
ASTANA. KAZINFORM - Qazaqstanda máıit donorlyǵy arqyly balalarǵa aǵza transplantatsııasyn damytý josparlanyp otyr. Bul týraly QR Densaýlyq saqtaý mınıstrligi Transplantattaý jáne joǵary tehnologııalyq medıtsınalyq qyzmetterdi úılestirý jónindegi respýblıkalyq ortalyǵy dırektorynyń orynbasary Nazgúl Jylgeldına aıtty.
Onyń aıtýynsha, pedıatrııalyq transplantatsııany keńeıtý – Densaýlyq saqtaý mınıstrliginiń strategııalyq baǵyttarynyń biri.
– Qazir bul baǵytta júıeli jumystar júrgizilip jatyr. Bıyl elimizde alǵash ret balaǵa júrek transplantatsııasy jasaldy. Endigi maqsattarymyzdyń biri – máıit donorlyǵy arqyly balalarǵa transplantatsııa jasaýdy damytý, – dedi Nazgúl Jylgeldına.
Onyń sózinshe, bul baǵytty damytý balalarǵa joǵary tehnologııalyq medıtsınalyq kómektiń qoljetimdiligin arttyryp, kúrdeli dıagnozy bar naýqastardyń ómirin saqtap qalýǵa múmkindik beredi.
Eske salaıyq, elimizde donorlyq aǵzaǵa muqtaj 4739 adam transplantatsııa kezeginde tur. Olardyń 125-i — balalar.
