Elimizde máslıhattar ınstıtýtynyń 30 jyldyǵyna oraı halyqaralyq konferentsııa ótedi
ASTANA. KAZINFORM - Búgin Senatta elimizdegi máslıhattardyń 30 jyldyǵyna arnalǵan halyqaralyq konferentsııaǵa daıyndyq barysy talqylandy. Osyǵan oraı ótken jıynda Palata Spıkeri Máýlen Áshimbaev Memleket basshysynyń tapsyrmasy boıynsha uıymdastyrylyp jatqan forým senatorlardyń máslıhat depýtattarymen ózara is-qımylyn odan ári arttyrýdy, jergilikti ókildi organdardyń qyzmetine qatysty mańyzdy máselelerdi sheshýdi jáne óńirlerdi damytýǵa yqpal etýdi kózdeıtinin atap ótti.
Óńirlerdi damytý jáne memlekettiń óńirlik saıasatyn tıimdi iske asyrý Senat jumysyndaǵy negizgi baǵyttardyń biri. Óz sózinde Máýlen Áshimbaev Parlament sońǵy jyldarda óńirlerdegi problemalardy sheshýge arnalǵan ondaǵan zań qabyldaǵanyn tilge tıek etti.
Qazirgi tańda Qazaqstanda máslıhattardyń qoǵamdyq-saıası mańyzy arta tústi. Osyǵan baılanysty Parlament Senatynyń uıytqy bolýymen elimizdegi máslıhattar ınstıtýtynyń 30 jyldyǵyna oraı 2024 jylǵy 18-19 sáýir kúnderi halyqaralyq konferentsııa ótkizý josparlanyp otyr.
Aıta keteıik, keshe Memleket basshysy Qasym-Jomart Toqaev Senat Tóraǵasy Máýlen Áshimbaevty qabyldady. Onda Palata Spıkeri reformalardy zańnamalyq turǵydan qamtamasyz etý jumystarynyń ótken aılardaǵy qorytyndysy jáne aldaǵy kezeńge arnalǵan jospary jóninde baıandady. Qabyldaý kezinde berilgen tapsyrmalardyń biri – Parlamenttiń zań shyǵarý qyzmetine jergilikti ókildi organdardyń depýtattaryn keńinen jumyldyrý.
«Prezıdentimiz Qasym-Jomart Kemeluly Toqaev elimizde júrgizilip jatqan reformalardy zańnamalyq turǵydan qamtamasyz etýdiń erekshe rólin jáne Palatanyń óńirlerdi damytýǵa tıgizip kele jatqan zor yqpalyn atap ótti. Konferentsııa alańynda Memleket basshysynyń bastamasymen qolǵa alynǵan saıası jáne ekonomıkalyq reformalardy iske asyrý kezindegi máslıhattardyń róli jan-jaqty talqylanady. Qýatty óńirler áleýmettik-ekonomıkalyq ál-aýqattyń negizi jáne eldiń draıveri ekeni anyq. Sondyqtan óńirlerdiń teńgerimdi damýyna jáne máslıhattardyń nátıjeli jumys isteýine yqpal etý jolynda kúsh jumyldyrýdyń mańyzy zor», – dedi Máýlen Áshimbaev.
Halyqaralyq konferentsııaǵa Parlament depýtattarymen birge barlyq deńgeıdegi máslıhattardyń tóraǵalary, sondaı-aq, qazaqstandyq jáne sheteldik sarapshylar qatysady josparlanyp otyr.
