Elimizde mashına jasaý óndirisi 22 paıyz ósti
ASTANA. KAZINFORM — Qazaqstanda mashına jasaý salasynda óndiris kólemi jeti aıda 3,2 trln teńgege jetip, byltyrǵy osy kezeńmen salystyrǵanda 22% ósti.
Saladaǵy ósim kólik óndirisiniń artýymen de baılanysty. Jeti aıda elde 96 myńnan astam avtokólik shyǵaryldy. Onyń ishinde jeńil avtomobıl óndirisi 37,2%, avtobýstar 27,6%, arnaıy tehnıka 45,1% artty.
Usaq toraptyq qurastyrýdyń úlesi 28,3%-ǵa jetti. Qostanaıdaǵy tolyq tsıkldi KIA Qazaqstan zaýyty men Almatydaǵy jylyna 90 myń avtokólik shyǵarýǵa arnalǵan Astana Motors Manufacturing zaýytynyń iske qosylýy óndiristik tizbekti keńeıtýge yqpal etip otyr.
Sonymen qatar kásiporyndardyń aınalasynda shınalar, akkýmýlıatorlar, avtokólik oryndyqtary men mýltımedıa júıelerin shyǵaratyn óndirister jolǵa qoıylǵan.
Agroónerkásip sektorynda otandyq 10 kásiporyn traktorlar men kombaındarǵa degen qajettiliktiń 90%-yn qamtamasyz etip otyr.
— Temirjol mashına jasaý salasynda óndiris kólemi 345 mlrd teńgege jetti: jolaýshylar vagondaryn shyǵarý 10,7%, elektrovozdar óndirisi 23,8% ósti, vagon-tsısternalar óndirisi ıgerildi. Astanadaǵy «Lokomotıv qurastyrý zaýyty» kásipornynda qazaqstandyq qamtý úlesi 75% boldy, — delingen habarlamada.
Metallýrgııa salasynda óndiris kólemi 8,1 trln teńgege jetti. Bolat óndirisi 4,1%, shoıyn 5,8%, jiksiz qubyrlar 30,4%, qurylys armatýrasy 10,5% ósti.
Hımııa ónerkásibinde óndiris kólemi 1 trln teńgege deıin artyp, ósim 26,9% boldy.
Jeńil ónerkásipte óndiris kólemi 125,5 mlrd teńgege jetip, 80,1% ósti. Onyń ishinde toqyma óndirisi 2,2 ese, kıim-keshek 27,5%, bylǵary óndirisi 20,3% artty.
Eske salaıyq, buǵan deıin Mınıstrler kabınetiniń músheleri mashına jasaý salasyn damytý barysyn talqyǵa salǵanyn jazǵanbyz.
