Elimizde mal urlyǵy 30,5 paıyzǵa azaıdy – ІІM

ASTANA. KAZINFORM – Jyl basynan beri el aýmaǵynda 69 mal urlyǵy faktisi tirkeldi. Bul týraly Іshki ister mınıstrliginiń resmı ókili Shyńǵys Álekeshev málim etti.

– 2024 jyly elimizde 1 026 mal urlyǵy boldy. Bul – byltyr tirkelgen jalpy urlyqtyń 3%-y. Maldyń jartysynan kóbin jaıylymda urlaǵan (1 026-dan 752-si). Sonymen qatar polıtsııa 89 qylmystyq topty quryqtady, onyń ishinde 572 adam mal urlaǵan. Sol sııaqty 4,5 myńnan astam urlanǵan mal ıesine qaıtaryldy. Osylaısha ótken jyly mal urlyǵynyń sany 30,5%-ǵa tómendedi, - dedi Shyńǵys Álekeshev vedomstvoda ótken onlaın baspasóz máslıhatynda.

Іshki ister mınıstrliginiń málimetine súıensek, elimizde keıingi 5 jylda mal urlyǵy 64%-ǵa azaıdy. 

– Jyl basynan beri, ıaǵnı qańtarda el aýmaǵynda 69 mal urlaý faktisi tirkelip, 53 kúdikti ustaldy. Sonymen qatar 10 qylmystyq top áshkerelendi jáne 450 urlanǵan maldyń 134-i ıelerine qaıtaryldy, - deıdi ol. 

Osy oraıda Іshki ister mınıstrligi mal urlyǵynan saqtaný erejelerin usynady:

- maldy qaraýsyz qaldyrmańyz; 

- GPS-trekerlerin ornatý arqyly baqylaýdyń zamanaýı ádisterin qoldańyz; 

- malǵa en salyp, tańbalaýdy jáne chıpteýdi umytpańyz. 

Buǵan deıin habarlaǵanymyzdaı, elimizde mal urlyǵy jazasy qatańdatyldy.