Elimizde mal soıý oryndary jańartylyp jatyr
ASTANA. KAZINFORM — Eldi mekenderde mal soıý oryndaryn kezeń-kezeńimen jańǵyrtý jumysy bastaldy.
— Tájirıbe kórsetkendeı, eldi mekenderdegi qarapaıym jáne tıptik mal soıý alańdaryn paıdalanýdan góri, mamandandyrylǵan mal soıý pýnkti áldeqaıda tıimdi. Mundaı pýnktter veterınarııalyq jáne sanıtarııalyq normalarǵa saı keledi, onda etke veterınarııalyq-sanıtarııalyq saraptama júrgizýge arnalǵan zerthana bar, sondaı-aq veterınarııalyq dáriger bolyp, ilespe qujatty rásimdeıdi, — delingen Premer-mınıstr Oljas Bektenovtiń depýtattyq saýalǵa bergen jaýabynda.
Úkimet basshysynyń málimetinshe, búginde birqatar eldi mekende mal soıý oryndaryn kezeń-kezeńimen jańǵyrtý jumysy bastaldy.
— 2024–2028 jyldarǵa arnalǵan aýyl sharýashylyǵynyń jalpy ónim kólemin 2 ese ulǵaıtý jónindegi jol kartasy aıasynda mal soıý pýnktterin salý boıynsha ındıkator kózdelgen. Bıýdjet qarajatynyń shekteýli bolýyna baılanysty aýyldyq jerlerde mal soıý pýnktterin salý jáne paıdalaný úshin memlekettik-jekeshelik áriptestik tetikteri aıasynda jeke ınvestıtsııa tartý sharasy qolǵa alyndy. Jańa jumys oryndaryn qurýmen qatar sanıtarııalyq-veterınarııalyq talaptyń saqtalýyn qamtamasyz etýge múmkindik beredi, — dedi ol.
Óńir ákimdikteriniń aqparatyna súıensek, ótken jyly 18 mal soıý pýnkti salyndy, al bıyl 224 nysannyń qurylysy josparlanǵan.
Bıyl sáýirde Іshki ister mınıstrligi Astana, Almaty jáne Shymkent qalasynda zańsyz mal soıý tsehtaryn anyqtaǵan edi.
Buǵan deıin habarlaǵanymyzdaı, bıyl aýyl sharýashylyǵy jobalaryna 50 mlrd teńge nesıe beriledi.