Elimizde lımon men apelsınniń kelisi qansha
Qazaqstanda qazir tsıtrýs ónimderine suranys artty. Óńirlerde apelsın men lımonnyń quny qansha? Kazinform agenttiginiń tilshisi oblys ortalyqtaryndaǵy dúkenderden baǵany bilip, salystyrdy. Keıbirinde edáýir aıyrmashylyq bar.
Elimiz boıynsha Túrkistan men Qaraǵandyda apelsın baǵasy tómen. Kelisi 850 teńgeden bastalady, keı jerderde myń teńgeden joǵary. Al Taraz qalasynda apelsınniń ortasha baǵasy kelisine 950 teńgeden bastalyp, 1 250 teńgege deıin jetti.
Taldyqorǵan men Almatyda baǵa sál joǵary. Sonda da bul óńirler baǵasy qoljetimdi qalalar qataryna kiredi. Kelisi myń teńgeden bastalady.
Oralda baǵa ortasha. Degenmen keıbir dúkenderde apelsınniń kelisi eki myń teńgege deıin jetedi. Al Qonaev qalasynda baǵa shamamen — 1 100 teńge. Petropavl, Shymkent pen Jezqazǵanda baǵa orta eseppen 1 800 — 2 000 teńge aralyǵynda.
Pavlodar men Aqtaýda baǵa shamamen 1 500 teńge aınalasynda. Al Óskemen men Semeıde kelisi — 1400 teńge. Astana men Kókshetaý qalalarynda baǵa kóterilip tur. Munda bir keli apelsınniń quny 1 800 teńge jáne odan joǵary.
Lımon baǵasy elimizdiń óńirlerinde ártúrli. Máselen ońtústik oblystarda, onyń ishinde Túrkistan men Tarazda kelisi 1200 teńge. Al Qonaev pen Almatyda lımondy 1 200 teńgege satyp alýǵa bolady.
Qaraǵandyda baǵa kóterildi. Lımonnyń kelisi shamamen 1 800 teńge. Qostanaı men Shymkent dúkenderinde ortasha baǵa — 1 600 — 2 100 teńge. Al Pavlodar, Aqtaý men Taldyqorǵanda baǵa eki myń teńge jáne odan joǵary.
Elimizdiń soltústigi men shyǵysynda baǵa shamalas. Petropavl men Jezqazǵanda lımonnyń kelisi 2 200 teńge, al Kókshetaý men Semeıde kelisi 2 500 teńge.
Baǵaǵa ádettegideı jetkizýshilerdiń qyzmeti, logıstıka men tsıtrýs ónimderiniń surpy áser etedi.
Elimizdiń ońtústiginde jańa pisken ónim satylady ári baǵasy tómen. Ónim soltústik, shyǵysqa jetkenshe jol shyǵyny qosylyp, baǵa joǵarylaıdy.
Buǵan deıin Qazaqstan qalalaryndaǵy qurma men anar baǵasyn salystyrdyq.