Elimizde qujat saqtaıtyn qansha arhıv bar

ASTANA. KAZINFORM – 9 maýsym – Halyqaralyq arhıvter kúni. Bul kásibı merekeni 2007 jyly qarashada Kvebek qalasynda ótken Bas assambleıada Halyqaralyq arhıv keńesi (International Council on Archives, ICA) resmı túrde bekitti.  

Mádenıet jáne aqparat mınıstrliginiń málimetinshe, merekeniń datasy kezdeısoq tańdalmaǵan. Dál osy kúni 1948 jyly ıÝNESKO-nyń qoldaýymen Halyqaralyq arhıv keńesi quryldy. Bul uıymnyń qurylǵan kúnine oraı Halyqaralyq arhıv kúni bekitildi. Al 2008 jyly alǵash ret mereke toılanǵan kezde HAK-tiń qurylǵanyna 60 jyl toldy. Ár memlekettiń arhıv salasyna qatysty merekesi túrli datalarǵa belgilengenmen, bul kún álemdegi barlyq arhıvshilerdiń basyn biriktiredi.

Elimizde qujattardy saqtaıtyn 236 memlekettik arhıv bar. Sonyń ishinde 5 respýblıkalyq, 5 arnaýly, 1 Prezıdent arhıvi jáne 225-i oblystyq, qalalyq, aýdandyq arhıvter jumys isteıdi.

Respýblıka boıynsha arhıv qyzmetkerleriniń sany – 3368 adam. Elimizdegi barlyq arhıvter Qazaqstan Respýblıkasynyń 1998 jylǵy 22 jeltoqsandaǵy «Ulttyq arhıv qory jáne arhıvter týraly» zańyna saı qyzmet atqarady.

Arhıv qory jyl saıyn orta eseppen 16 myńnan astam uıymnan 300-400 myń ispen tolyqtyrylady. Qazirgi tańda QR Ulttyq arhıv qorynda 27.5 mln-nan astam qujat saqtalady.

Arhıv halyqtyń derekti jadynyń saqtaýshysy retinde eldiń zııatkerlik menshigi men mádenı ıgiliginiń tutastyǵymen saqtalýyn qamtamasyz etedi.