Elimizde qutqarýshylar sany jetkilikti me

ASTANA. KAZINFORM – Tótenshe jaǵdaı týyndaǵanda qutqarýshylar sany jete me? Bul saýalǵa TJM Azamattyq qorǵanys jáne áskerı bólimder komıteti tóraǵasynyń orynbasary Aqylbek Ahmetjanov jaýap berdi.

«Turǵyndary mıllıonnan asatyn qalalarda shamamen 100-150 qutqarýshy bar. Olar jaz aılarynda ǵana emes, barlyq maýsymda, tótenshe jaǵdaı týyndaǵanda qutqarýmen aınalysady. Búginde elimizde 85 myńnan astam ózen men 48 myń kól bar. Barlyq jaǵajaıǵa qutqarýshylardy qoıý múmkin emes. Degenmen qutqarýshylarǵa óńirlerdegi Tótenshe jaǵdaılar departamentteriniń qyzmetkerleri, órt sóndirýshiler, volonterler kómekke kelip, birlesip jumys istep jatyr», - dep jaýap berdi Aqylbek Ahmetjanov Ortalyq kommýnıkatsııalar qyzmeti alańynda ótken baspasóz máslıhatynda.

Sondaı-aq, spıker qajet jaǵdaıda polıtseıler men kólik ınspektsııasy qyzmetkerleriniń qutqarý jumystaryna tartylatynyn aıtty.

Buǵan deıin habarlaǵanymyzdaı, bıyl shomylý maýsymy bastalǵaly 70 adamnyń ajaly sýdan kelgen. Onyń ishinde 30 bala bar.

TJM ókiliniń aıtýynsha, sýǵa ketken balalardyń deni qaraýsyz qalǵan nemese ruqsat etilmegen jerde shomylǵan.