Elimizde «Qurmetti donor» marapaty taǵaıyndaldy

Qurmet belgisiniń alǵashqy ıegerleri bekitilgen talaptarǵa tolyq sáıkes keletin 481 turaqty donor bolady. Qazaqstan Respýblıkasy Úkimetiniń qabyldaǵan qaýlysyna sáıkes vedomstvolyq tósbelgi Qazaqstan Respýblıkasynyń azamattaryna, sondaı-aq sheteldikter men azamattyǵy joq adamdarǵa óteýsiz negizde donorlyq jasaǵany úshin beriledi. Atap aıtqanda, qan jáne (nemese) trombotsıt donorlyǵy – keminde 40 ret, qan plazmasynyń donorlyǵy – keminde 70 ret bolýy tıis.

Bul sheshim arqyly Úkimet adam ómirin qutqarý jolynda turaqty ári óteýsiz donorlyq jasap júrgen qazaqstandyqtardyń eńbegine tarıhı ádildik ornatty. Endi olardyń ıgi isi erekshe mártebemen aıqyndalyp, joǵary baǵalanyp otyr.

Tósbelgilerin daıyndaýdy Qazaqstan teńge saraıy júzege asyrady. Medaldiń árbir bólshegi tereń maǵynalyq mánge ıe jáne Qazaqstan Respýblıkasy Geraldıka jónindegi respýblıkalyq komıssııasy bekitken.

Bekitilgen dızaınǵa sáıkes tósbelginiń negizgi sımvoly qanyq qyzyl tústi emalmen kómkerilgen qan tamshysy túrinde jasalǵan. Tamshynyń ishinde aq tústi emalmen beınelengen júrek soǵysynyń grafıkalyq yrǵaǵy ornalasqan. Barlyq kompozıtsııa kúńgirt óńdelgen dóńgelek jıekpen qorshalǵan.

Densaýlyq saqtaý mınıstrligi málimetinshe, jyl saıyn Qazaqstanda 180 myńnan astam azamat donor atanyp, 255 myńnan astam donorlyq rásim jasaıdy. Sonyń nátıjesinde jyl saıyn 80 myńnan astam patsıentke sapaly qan quıý kómegi kórsetilip, olardyń ómirin saqtap qalýǵa jáne saýyǵýyna múmkindik beriledi.

«Halyq densaýlyǵy jáne densaýlyq saqtaý júıesi týraly» Qazaqstan Respýblıkasynyń Kodeksine sáıkes medıtsınalyq tekserýden ótý jáne qan men onyń komponentterin tapsyrý kúnderi donor bolyp tabylatyn qyzmetker jumys berýshi tarapynan ortasha jalaqysy saqtala otyryp jumystan bosatylady.

Aıta keteıik, donorlyq kórsetkish boıynsha Astana, Almaty jáne Shymkent kósh bastap tur.