Elimizde Quryltaı depýtattaryn saılaý bastaldy
ASTANA. KAZINFORM – Búgin elimizdiń barlyq óńirinde Quryltaı depýtattaryn saılaý bastaldy. Daýys berý 10 423 saılaý ýchaskesinde ótedi.
Barlyq saılaý ýchaskesiniń 79-y Qazaqstannyń 61 shet memlekettegi dıplomatııalyq ókildikteri janynan ashylǵan. Olardyń ishinde Japonııa men Ońtústik Koreıadaǵy saılaý ýchaskesi Astana ýaqytymen saǵat 03:00-de jumysyn bastap ketti.
Eń sońǵy bolyp AQSh-tyń San-Frantsısko qalasyndaǵy elimizdiń Bas konsýldyǵy janynda saılaý ýchaskesi Astana ýaqytymen 19:00-de ashylady.
Al Iran men Ýkraınadaǵy áskerı-saıası jaǵdaıdyń kúrdeliligine baılanysty Qazaqstannyń atalǵan elderdegi Elshilikteri janyndaǵy saılaý ýchaskeleri jumysyn toqtatsa, Efıopııadaǵy Elshilik janyndaǵy saılaý ýchaskesi saılaýshylardyń joq bolýyna baılanysty ashylmaıdy.
Aıta keterligi, elimizdegi 100-den astam saılaý ýchaskesi jumysyn tańǵy saǵat 6:00-de bastady. Sonymen qatar áskerı bólimderde, shalǵaı jáne qatynasý qıyn aýdandarda, shalǵaıdaǵy mal sharýashylyǵy ýchaskelerinde, úzdiksiz jumys isteıtin óndirisi bar uıymdarda, demalys úılerinde, sanatorıılik-kýrorttyq uıymdarda, statsıonarlyq jaǵdaıda emdelip jatqan, jumysty vahtalyq ádispen uıymdastyrý oryndarynda qoǵamnan ýaqytsha oqshaýlaýdy qamtamasyz etetin arnaýly mekemelerde, QR shet memleketterdegi ókilettikteri janynda qurylǵan saılaý ýchaskelerinde eger tizimge engizilgen barlyq saılaýshy daýys berse, ýchaskelik saılaý komıssııasy kez kelgen ýaqytta daýys berýdi aıaqtaldy dep jarııalaı alady. Mundaı ýchaskelerdiń sany — 625.
Quryltaı depýtattyǵynan «Aq jol», JSDP, «Ádilet», QHP, «Aýyl» partııasy, «Baıtaq» jáne Respublica partııalarynyń ókilderi úmitti. Atalǵan partııalardyń ókilderi úgit-nasıhat kezeńinde 4 márte telebedatqa qatysty. Quryltaıdyń 145 depýtattyq mandatyna 545 kandıdat tirkelgen.
