Elimizde qurylys kúrdeliligin baǵalaýdyń jańa ólshemsharttary bekitildi
ASTANA. KAZINFORM — Ónerkásip jáne qurylys mınıstrliginiń buıryǵymen qurylys nysandarynyń tehnıkalyq kúrdeliligin anyqtaý qaǵıdalary aıqyndaldy.
Qujat nysandardy olardyń fýnktsıonaldyq maqsatyna, konstrýktıvtik erekshelikterine, qabat sanyna, sondaı-aq qurylystyń seısmıkalyq jáne geologııalyq jaǵdaılaryna qaraı jaýapkershilik deńgeılerine jatqyzý ólshemsharttaryn belgileıdi. Erejege sáıkes, tehnıkalyq kúrdelilik úsh deńgeıge bólinedi: joǵary, qalypty jáne tómen.
Jaýapkershilik deńgeıin tapsyrys berýshi aıqyndaıdy jáne ol jobalaý kezeńinde jobalaý uıymymen rastalady. Ol kórsetkish joba materıaldarynda nysannyń negizgi tehnıkalyq sıpattamasy retinde kórsetiledi.
Birinshi (joǵary) deńgeıge eń kúrdeli ári yqtımal qaýipti nysandar jatady. Olardyń qatarynda qaýipti óndiristik obektiler, atom energııasyn paıdalaný nysandary, qýaty 150 MVt-tan asatyn jylý energetıkalyq stantsııalar, 25 qabattan joǵary ǵımarattar, iri medıtsınalyq jáne bilim berý mekemeleri, sondaı-aq áýejaılar, metropolıtender, magıstraldyq joldar men qubyr jelileri sııaqty ınfraqurylymdyq nysandar bar.
Ekinshi (qalypty) deńgeıge ortasha kúrdeli nysandar kiredi: 6 qabattan 25 qabatqa deıingi turǵyn úıler, ákimshilik jáne áleýmettik nysandar, agroónerkásip kesheni kásiporyndary, janarmaı quıý stantsııalary, II–III sanattaǵy joldar, sondaı-aq ortasha qýatty ınjenerlik jeliler men qurylystar.
Úshinshi (tómen) deńgeıge senimdilik pen qaýipsizdik talaptary eń tómen nysandar jatady. Olar: shaǵyn qabatty turǵyn úıler, shaǵyn bıznes nysandary, tómen qýatty ınjenerlik jeliler, ýaqytsha qurylystar jáne abattandyrý elementteri.
Buǵan deıin Úkimet basshysy Oljas Bektenov qurylys salasyndaǵy sheshimin tappaǵan máselelerdi ataǵan edi.
