Elimizde kýrer qyzmetine qabyldaýdyń biryńǵaı qaǵıdasy qabyldanady
ASTANA. KAZINFORM — Eńbek jáne halyqty áleýmettik qorǵaý mınıstri Asqarbek Ertaev Almatyda qolyndaǵy kishkentaı balasymen kýrer qyzmetine kirgen áıeldiń oqıǵasynan keıin qandaı shara qabyldanatynyn aıtty.
- ıAndeks jáne Glovo basshylyǵymen bul máseleni talqyladyq. «Ne sebepti kishkentaı balamen kýrerlik jumysqa qabyldaǵan?» degen suraqty joldadyq. Qazir olar ózderiniń usynystaryn aıtyp jatyr, ıaǵnı adamdardy qyzmetke qabyldaýǵa qatysty biryńǵaı qaǵıda jasalmaq. Osy jobany jasaýǵa daıynbyz. Kelesi aıda bul joba júzege asady dep oılaımyn, - dedi A. Ertaev Senattyń jalpy otyrysynan keıin tilshiler suraǵyna jaýap bere otyryp.
Onyń aıtýynsha, osy qyzmetterde jumys isteýge arnalǵan biryńǵaı qaǵıda qazir pysyqtalyp jatyr.
- Jas analar kýrer retinde jumys isteı alady. Ár adam kýrer nemese taksıde, sondaı-aq basqa da qyzmetterde óz qalaýy boıynsha jumys isteýge quqyly. Biraq tıisti tártip pen talaptar bolýy kerek. Eger qolynda kishkentaı balasy bolsa, qalaı jumys isteıdi? Sondyqtan biryńǵaı qaǵıdaǵa osynyń bárin jazamyz, - dedi mınıstr.
Eske salsaq, byltyr kúzde elde kýrerlerge tumaýǵa qarsy vaktsınany tegin saldyrý máselesi pysyqtalyp jatqany aıtyldy.
