Elimizde kúnkóris deńgeıi boıynsha ózgerister qaralyp jatyr
ASTANA. KAZINFORM – Árbir besinshi qazaqstandyq memleket jaǵynan áleýmettik qoldaý alyp otyr. Bul týraly Premer-Mınıstrdiń orynbasary Tamara Dúısenova málim etti.
«Áleýmettik qamsyzdandyrý máselesine toqtalsaq, memleket azamattarmyz aldyndaǵy barsha áleýmettik mindettemelerin tolyq oryndap keledi. Qazir árbir besinshi qazaqstandyq memleket jaǵynan áleýmettik qoldaý alyp otyr. Onyń tıimdiligin arttyrýda tsıfrlyq ónimderdi engizý basty orynda. Byltyr bul saladaǵy tsıfrlandyrý nátıjeleri Birikken Ulttar Uıymy jáne halyqaralyq ınstıtýttar tarapynan oń baǵasyn alyp, ózge elderge úlgi etip kórsetip jatyr», - dedi T. Dúısenova Májilistiń jalpy otyrysynda.
Osy oraıda ol qazir áleýmettik qoldaýdyń basym kópshiligi (27 túri) boıynsha qyzmet proaktıvti format aıasynda atqarylyp jatqanyn eske saldy.
«Byltyr Memleket basshysynyń Joldaýynda qarastyrylyp, depýtattar tarapynan qoldaý tapqan qaýipti jumys oryndardaǵy qyzmetkerlerdiń arnaýly járdem aqylary bıyldyń basynan tólenip keledi. Qazir ony alatyndardyń sany 7 140 adamǵa jetip, ol maqsatqa 1,2 mlrd tenge qarjy jumsaldy. Bul jumys jalǵasady. Negizgi standart retinde qoldanylatyn kúnkóris deńgeıi turǵysynda aıtqan depýtattardyń syny boıynsha da ózgerister qaralýda. ıAǵnı Áleýmettik Kodekste eskerilgendeı, keler jyldan medıandyq tabysqa ótý mehanızmderi pysyqtalyp otyr. Bul azamattardyń tabys deńgeıiniń naqty kórsetkishi retinde halyqaralyq praktıkada ataýly áleýmettik kómekti belgileýde qoldanylyp jatyr. Bizde kezeń-kezeńmen osy mehanızmdi engizetin bolamyz», - dedi Úkimet basshysynyń orynbasary.
