Elimizde kúnbaǵys maıy qanshadan satylyp jatyr
ASTANA. KAZINFORM – Kúnbaǵys maıy áleýmettik mańyzy bar 19 azyq-túlik tizimine kiredi jáne ony árbir adam tutynatyny ras. Ulttyq statıstıka bıýrosynyń málimetinshe, elimizde ósimdik maıy lıtriniń ortasha baǵasy 620 teńge, bul byltyrǵa qaraǵanda 21%-ǵa arzan. Osy oraıda Kazinform agenttigi óńirlerdegi kúnbaǵys maıy baǵasyna sholý jasaǵan edi.
Saýda sórelerinde otandyq jáne ımporttyq ósimdik maıynyń birneshe túri bar. Elimizde kúnbaǵys maıyn óndiretin 54 shaǵyn jáne iri kásiporyn jumys isteıdi.
Energyprom.kz resýrsynyń málimetine súıensek, jyl basynan beri elimizde 374 myń tonnadan astam ósimdik maıy shyǵarylypty, onyń deni Shyǵys Qazaqstan oblysynda óndiriledi. Aıta ketsek, bizde tazartylǵan jáne tazartylmaǵan kúnbaǵys maıy óndiriledi. Sonymen qatar, sońǵy ýaqytta ımport kólemi qysqarǵan, al óndiris kóbeıgen.
Resmı statıstıka boıynsha búginde kúnbaǵys maıynyń eń joǵary ortasha baǵasy Atyraýda tirkelgen, lıtri 718 teńge, al tómen baǵa Aqtóbede tirkelipti, lıtri 550 teńge turady.
Aıtpaqshy, aqtóbelik turǵyndar bir bótelke kúnbaǵys maıyn orta eseppen 450-650 teńgege satyp alýǵa bolatynyn aıtty. Qyzylordada kúnbaǵys maıy baǵasy ortasha alǵanda 450-500 teńge. Degenmen tańdaý erki tutynýshyda ekenin aıta ketken jón. Sebebi sýpermarketterde qazaqstandyq jáne sheteldik kúnbaǵys maıy qatar usynylady. Osy oraıda ımporttyq maıdyń bótelkesi 1 000 teńge jáne odan joǵary bolýy múmkin. Demek, tutynýshy otbasylyq bıýdjetiniń múmkindigi men qalaýyna qaraı tańdaıdy.
Aıtalyq, Petropavl dúkenderinde bir bótelke ósimdik maıy 470-650 teńgeden satylyp jatyr. Taldyqorǵanda – 450-500 teńgege, al Qaraǵandyda bir lıtr maıdy ortasha eseppen 500-700 teńgege satyp alýǵa bolady. Biraq, statıstıka boıynsha eń qymbat degen Atyraýdyń ózinde lıtrin 500-550 teńgege kúnbaǵys maıyn tabýǵa bolady.
Odan ary Qostanaıda kúnbaǵys maıynyń lıtri 540-800 teńge, Oral, Taraz jáne Qonaev qalasynda 500-600 teńgege, al Jezqazǵanda kúnbaǵys maıyn 500-800 teńgeden satyp jatyr. Óskemende ortasha alǵanda suıyq maıdyń lıtri 600 teńge, Semeıde 620-660 teńgeden alýǵa bolady. Al Pavlodar óńirinde lıtrin 600-650 teńgege alasyz.
Sondaı-aq Kókshetaý, Túrkistan jáne Shymkentte bir bótelke maıdyń ortasha baǵasy 600-700 teńgeni quraıdy. Aqtaýda ortasha baǵa 650 teńgege teń. Almatynyń sýpermarketterinde ósimdik maıynyń bótelkesin ortasha alǵanda 450-690 teńgege, al Astana dúkenderinde kúnbaǵys maıyn 470-700 teńgege satyp jatyr.
