Elimizde qýaty 7,3 GVt jańa generatsııa kózderi iske qosylady
ASTANA. KAZINFORM — Úkimet otyrysynda QR Energetıka mınıstri Erlan Aqkenjenov paıdalanýǵa beriletin jańa elektr qýaty kózderi jóninde málimdeme jasady.
— El ekonomıkasynyń ósip kele jatqan qajettilikterin qamtamasyz etý jáne eksporttyq áleýetti arttyrý maqsatynda «Energetıkalyq jáne kommýnaldyq sektorlardy jańǵyrtý» ulttyq jobasy sheńberinde 2029 jylǵa deıin jalpy somasy 6,2 trln teńge bolatyn jalpy kólemi 7,3 GVt jańa generatsııa kózderin iske qosý, onyń ishinde qoldanystaǵy qýattardy almastyrýǵa baǵyttalǵan jobalar kózdelgen, — dedi ol.
Osylaısha, ulttyq joba sheńberinde jańa qýattardyń ósimi 6 484 MVt bolsa, al qolda bar qýattardy almastyrý kólemi qazirdiń ózinde 825 MVt-qa jetken.
Sonymen qatar, bıyl ulttyq joba sheńberinde shamamen 2 418 MVt qýatty iske qosý josparlanyp otyr.
Al 2027 jyly shamamen 825 MVt jańa qýat iske qosylmaq. Onyń ishinde Jambyl MAES-inde jalpy qýaty 210 MVt bolatyn 5 gaz-týrbınalyq qondyrǵyny jáne «MAEK» jaýapkershiligi shekteýli seriktestiginde qýaty 160 MVt bý-gaz qondyrǵysyn iske qosý josparda bar.
— Atalǵan qýattardy iske qosý 2027 jyldyń basynan bastap ekonomıkanyń elektr energııasyna degen qajettiligin tolyq qamtamasyz etýge múmkindik beredi, al 2027 jyldyń sońyna qaraı elektr energııasynyń shamamen 1,3 mlrd kVt/saǵ kóleminde profıtsıtin qalyptastyrady. Sonymen qatar Ulttyq joba sheńberinde 2028–2029 jyldary 4 000 MVt-tan astam qýatty iske qosý kózdelgen. Osylaısha, 2029 jyly Qazaqstannyń energııa júıesinde 20% kólemindegi qajetti qýat rezervi eskerile otyryp, elektr energııasy profıtsıtiniń turaqty qamtamasyz etiledi. Bul óz kezeginde elimizdiń eksporttyq áleýetin arttyrýǵa múmkindik beredi, — dedi Erlan Aqkenjenov.
Aıta keteıik, buǵan deıin energetıka men kommýnaldyq sektordy jańǵyrtý isinde otandyq ónimge basymdyq beriletinin jazǵanbyz.
