Elimizde «Kitap oqıtyn ult» marafonyna 1,4 mıllıonnan astam adam qatysyp jatyr
ASTANA. KAZINFORM — Astanada Mádenıet jáne aqparat mınıstri Arman Qyryqbaevtyń tóraǵalyǵymen «Kitap oqıtyn ult» respýblıkalyq marafonynyń barysyna arnalǵan keńes ótti.
Jıynda marafonnyń aralyq nátıjeleri men kitap oqýdy keńinen nasıhattaý boıynsha aldaǵy sharalar talqylandy. Marafon Qazaqstan Respýblıkasy Prezıdentiniń «Kitap oqý mádenıetin damytý jáne zerdeli ult qalyptastyrý jónindegi sharalar týraly» Jarlyǵyn oryndaý maqsatynda ótkizilip keledi.
Búginde jobaǵa 1,4 mıllıonnan astam adam qatysyp jatyr. Olardyń qatarynda mektep oqýshylary, stýdentter, pedagogter, otbasylar, eńbek ujymdarynyń ókilderi, memlekettik qyzmetshiler men shyǵarmashylyq zııaly qaýym ókilderi bar. Barlyq óńirde jobalyq keńseler qurylyp, qazaq jáne orys tilderindegi 345 ádebı shyǵarmadan turatyn biryńǵaı tizim jasalǵan. Sonymen qatar reading-nation.kz tsıfrlyq platformasy jumys isteıdi.
Qatysýshylar platformada oqyǵan kitaptary týraly pikirlerin jarııalaıdy. Jarııalanǵan pikir sany boıynsha Aqtóbe oblysy – 25 557, Soltústik Qazaqstan oblysy – 14 249 jáne Qyzylorda oblysy 14 037 pikirmen alda keledi.
Soltústik Qazaqstan oblysynda tirkelgen 20 myńǵa jýyq qatysýshynyń 14 myńnan astamy platformaǵa pikir jazǵan. Bul óńirdegi qatysýshylardyń shamamen 75%-yn quraıdy. Áleýmettik jelilerde oqylǵan shyǵarmalar týraly 20 myńnan astam beınepikir jarııalanǵan. Bul kórsetkish boıynsha Astana qalasy men Jambyl oblysy kósh bastap tur – elordada 3 myńǵa jýyq, Jambyl oblysynda 1 699 jarııalanym bar. Keńeste óńir ókilderi oqyrmandardyń belsendiligin arttyrý tájirıbesin bólisti.
Mádenıet jáne aqparat mınıstrligi málimetinshe, aýyldyq jerlerde kitap oqý mádenıetin damytýǵa, kitaptardyń kópshilikke qoljetimdi bolýyna, sondaı-aq marafonǵa qoǵam qaıratkerlerin, bıznes ókilderi men shyǵarmashylyq zııaly qaýymdy tartýǵa aıryqsha nazar aýdaryldy.
Usynystardyń qatarynda dúkenderde arnaıy kitap sórelerin ornalastyrý, jazýshylarmen kezdesýler ótkizý, ádebı shyǵarmalar jelisimen komıkster, kitaptardy tanystyratyn treılerler men qysqa beınerolıkter ázirleý bar. Sondaı-aq «Kitap Talks» óńirlik medıajobasyn iske qosyp, «Kitap Quiz» zııatkerlik oıyndaryn uıymdastyrý usynyldy.
«Bılet s knıgoı» bastamasy aıasynda mádenıet mekemeleriniń elektrondy bıletteri men aqparattyq materıaldaryna marafon týraly málimet pen QR-kodtar ornalastyrý josparlanyp otyr. Kitap oqýdy nasıhattaý úshin kitaphanalardyń, joǵary oqý oryndarynyń, óńirlik kreatıvti habtar men qoǵamdyq keńistikterdiń múmkindikterin paıdalaný usynyldy. Bul jumys aýyldar men shalǵaı eldi mekenderdi de qamtýǵa tıis.
Keńes qorytyndysynda óńirlik jobalyq keńselerdiń jumysyn úılestirýdi jetildirý, halyqty marafonǵa keńinen tartý jáne onyń nátıjelerin júıeli qadaǵalaý jónindegi aldaǵy mindetter belgilendi.
Elimizde alǵashqy respýblıkalyq «Kitap oqıtyn ult» kitap oqý marafonyna tirkelý júrip jatqanyn jazǵan edik. Jobaǵa mektep oqýshylarynan bastap stýdentter, ustazdar, memlekettik qyzmetshiler men tutas otbasylar qatysa alady.
