Elimizde krıptoaıyrbastaý qyzmeti jandanady – Ulttyq quryltaı

BÝRABAI. KAZINFORM – Memleket basshysy Qasym-Jomart Toqaev Ulttyq quryltaıdyń ІV otyrysynda krıptoaıyrbastaý, tsıfrlyq maınıng salalaryn yryqtandyrýdy tapsyrdy.

- Ekonomıkanyń barlyq salasyna tsıfrlyq tehnologııalardyń engizilýi elimizdiń básekege qabiletin arttyratyn eń basty faktor bolýǵa tıis. Bul jerde tsıfrlyq aktıvter ındýstrııasy men blokcheın tehnologııasyn damytý mańyzdy ról atqarady, - dedi Memleket basshysy.

Qasym-Jomart Toqaev tsıfrlandyrý salasyndaǵy jańashyldyqtar tsıfrlyq aktıvterdiń kóleńkeli aınalymyn azaıtýǵa baǵyttalýy kerektigin basa aıtty.

- Tsıfrlyq aktıvterdiń zańdy aınalymyn qamtamasyz etý, krıptoaıyrbastaý qyzmetin júrgizý jáne tsıfrlyq maınıngke ınvestıtsııa tartý úshin osy salany retteý isin yryqtandyrýdyń shuǵyl sharalaryn qabyldaý qajet. Bul qadam elimizdiń osy aımaqtaǵy tsıfrlyq qarjy tehnologııalarynyń ortalyǵy retindegi rólin arttyrady. Sondaı-aq, tsıfrlyq aktıvterdiń kóleńkeli aınalymyn azaıtýǵa múmkindik beredi ári salyq túsimin kóbeıtýge septigin tıgizedi, - dedi Prezıdent. 

Aıta ketý kerek, quryltaıdyń paneldik sessııalary keshe bastalǵan. Ol sektsııalardyń taqyryptary azamattyq qoǵam, mádenıet, óner, rýhanııat, bilim jáne ǵylym, áleýmettik-ekonomıkalyq damý máselelerin qamtydy.