Elimizde kredıttik reıtıng agenttikteriniń qyzmetin retteıtin zań jobasy ázirlendi

ASTANA. KAZINFORM — Elimizde kredıttik reıtıng agenttikteriniń qyzmetin retteıtin zań jobasy ázirlendi. Bul týraly Qarjy naryǵyn retteý jáne damytý agenttigi Baǵaly qaǵazdar naryǵy departamentiniń dırektory Aıdyn Dáýletbaq aıtty.

— Qarjy naryǵyn retteý jáne damytý agenttigi halyqaralyq tájirıbege súıene otyryp, kredıttik reıtıng agenttikteriniń qyzmetin retteıtin zań jobasyn ázirledi. Zań jobasynda birneshe halyqaralyq uıymdardyń usynystary eskerildi. Mysalǵa, IOSCO — Baǵaly qaǵazdar jónindegi komıssııalardyń halyqaralyq uıymynyń standarttary. Ol kredıttik reıtıngtik agenttikter úshin kásiptik minez-qulyqtyń negizgi qaǵıdattaryn aıqyndaıdy jáne baǵaly qaǵazdar naryǵyn retteý maqsattaryn belgileıdi, — dedi departament basshysy Ortalyq kommýnıkatsııalar qyzmetindegi brıfıngte.

Sondaı-aq, Aıdyn Dáýletbaq Bazel banktik qadaǵalaý komıtetiniń talaptary qarastyrylǵanyn aıtady. Ol Bazel II jáne Bazel III aıasynda kredıttik táýekelderdi baǵalaý agenttikterine qoıylatyn biliktilik talaptaryn aıqyndaıdy.

— Eýropalyq odaqtyń reıtıngtik qyzmetterge qatysty dırektıvalary da eskerildi. Zań jobasy reıtıng agenttikteriniń jumysynyń negizgi qaǵıdattaryn qamtamasyz etýge baǵyttalǵan. Olar: obektıvtilik, táýelsizdik, ashyqtyq, aqparatty jarııa etý, resýrstardyń jetkiliktiligi, agenttikterdiń qadaǵalanýy men eseptiligi. Bul zań jobasy Qarjy sektoryn damytýdyń 2030 jylǵa deıingi tujyrymdamasyn júzege asyrý aıasynda ázirlengen. Onyń qabyldanýy elimizde táýelsiz reıtıngtik baǵalaý ınstıtýtynyń damýyna jaǵdaı jasaıdy. Bul óz kezeginde, qor naryǵy arqyly bıznesti qarjylandyrý tetikterin keńeıtedi, — dedi ol.

Osy jyldyń aqpanynda Standard& Poor’s halyqaralyq reıtıng agenttigi Qazaqstannyń táýelsiz kredıttik reıtıngin «BBB-/A-3» deńgeıinde rastady, boljam — «Turaqty».