Elimizde kredıt bıýrosyna qoıylatyn talaptar kúsheıdi
ASTANA. KAZINFORM — Qarjy naryǵyn retteý jáne damytý agenttigi 16 tamyzdaǵy qaýlysymen kredıt bıýrosyna qoıylatyn talaptar kúsheıdi.
Osy qaýly arqyly qashyqtan qyzmet kórsetý úshin baǵdarlamalyq qamtylymnyń qaýipsizdigi boıynsha kredıttik bıýrolarǵa qoıylatyn qosymsha talaptar belgilendi.
Talaptarǵa sáıkes kredıttik bıýrolar baǵdarlamalyq qamtylymdy paıdalanýǵa bergenge deıin onyń bastapqy kodynyń qaýipsizdigine taldaý jasaıdy jáne anyqtalǵan kemshilikterdi joıady.
Qaýlyda kredıttik bıýrolardyń veb-qosymshalary men mobıldik qosymshalaryn ázirleýdiń de, olardy paıdalanýdyń da qaýipsizdigin qamtamasyz etý tártibi qosymsha aıqyndalǵan.
Kredıt bıýrolarynyń mobıldi qosymshasynan operatsııalyq júıesiniń qorǵanys tetikterin buzý nemese klıenttiń qurylǵysyn qashyqtan basqarý belgileri anyqtalsa, qashyqtan qyzmet kórsetýdi buǵattaý kózdelgen.
Bul normalar kredıt bıýrolaryn baǵdarlamalyq qamtylymnyń qaýipsizdik normalaryn kúsheıtýge mindetteıdi, bul azamattar úshin olardyń derekterin óńdeý kezinde qosymsha qorǵanys bolady.
Qujatta kredıttik bıýrolardy agenttiktiń aqparattyq qaýipsizdik salalyq ortalyǵynyń aqparatpen almasý júıesine qosý boıynsha qosymsha talaptar aıqyndalǵan.
Bul kredıt bıýrolarynyń aqparattyq qaýipsizdikti basqarý júıesiniń jaı-kúıi, sondaı-aq aqparattyq qaýipsizdik oqıǵalary men oqys jaǵdaılary týraly aqparatty onlaın rejımde alýǵa múmkindik beredi.
