Elimizde kóshpeli donorlyq brıgadalardyń jumysy keńeıtiledi
ASTANA. KAZINFORM — Qazaqstanda qan donorlaryn kóbeıtý úshin kóshpeli donorlyq brıgadalardyń jumysyn keńeıtý josparlanyp otyr. Bul týraly Transfýzıologııa ǵylymı-óndiristik ortalyǵy Kazinform agenttiginiń resmı saýalyna bergen jaýabynda málim etti.
Ortalyqtyń málimetinshe, 2026–2027 jyldary erikti jáne turaqty donorlyqty damytýǵa baǵyttalǵan birqatar bastama iske asyrylady. Sonyń biri — kásiporyndar men uıymdarǵa baryp, qan qabyldaıtyn kóshpeli donorlyq brıgadalardyń jumysyn kúsheıtý.
— Mundaı tásil azamattarǵa qan tapsyrýdy qoljetimdi etip, jańa donorlardy tartýǵa múmkindik beredi. Sonymen qatar iri kompanııalar men kásiporyndardy korporatıvtik donorlyq qozǵalysqa tartý, turaqty qan tapsyrý aktsııalaryn ótkizý kózdelip otyr. Sonymen qosa áleýmettik jeliler men buqaralyq aqparat quraldary arqyly donorlyq mádenıetti keńinen nasıhattap, donorlardy shaqyrýdyń tsıfrlyq júıelerin jetildirý jáne qyzmet kórsetý sapasyn arttyrý da qolǵa alyndy, — dedi bólim basshysy.
Sondaı-aq aldaǵy kezeńde memlekettik organdarmen, joǵary oqý oryndarymen jáne bıznes qaýymdastyqpen yntymaqtastyqty keńeıtý jumystary jalǵasatyn bolady.
Aıta keteıik, sońǵy 10 jylda elimizde 1,6 mln-nan astam adam qan tapsyrǵan.
