Elimizde kómir óndiretin 30 kásiporynda 32 myńnan asa adam eńbek etedi

ASTANA. KAZINFORM — Qazaqstanda jyl saıyn 31 tamyzda Shahterler kúni atalyp ótedi, dep habarlaıdy Energetıka mınıstrliginiń baspasóz qyzmeti.

Energetıka mınıstri Erlan Aqkenjenovtiń sózinshe, búgingi tańda da shahterler elimizdiń damýyna sheshýshi úles qosyp keledi. Kenshi eńbegi — naǵyz erlik. Jer qoınaýynan paıdaly qazbalardy óndirý joǵary biliktilikti ǵana emes, tolyqtaı janqııarlyqty qajet etedi.

— Elimizde 30 kómir óndiretin kásiporynda 32 myńnan astam adam eńbek etip, jyl saıyn 100 mıllıon tonnadan astam kómir óndiredi. Sonyń arqasynda sala elimizdegi elektr energııasynyń 70%-yn óndirýdi qamtamasyz etip, koksohımııa óndirisin tolyq júkteıdi, sondaı-aq ónerkásiptik kásiporyndardyń, kommýnaldyq-turmystyq sektor men halyqtyń otynǵa degen qajettiligin tolyq qanaǵattandyrady. Sizderdiń eńbekterińizdiń arqasynda energetıkalyq turaqtylyq qamtamasyz etilip, ónerkásip damyp, Qazaqstannyń ekonomıkalyq áleýeti nyǵaıa túsýde, — dep atap ótti mınıstr.

Erlan Aqkenjenov sala mamandaryn kásibı merekesimen quttyqtady.

— Qazaqstandaǵy kómir ónerkásibiniń tarıhy onyń bastaýynda turǵan adamdardyń esimderimen tyǵyz baılanysty. Dál osy ardagerler berik negiz qalap, urpaqtar sabaqtastyǵyn qamtamasyz etip, eńbektiń qaýipsizdik mádenıeti men dańqty dástúrlerin qalyptastyrdy. Barlyq kenshiler men kómir ónerkásibi ardagerlerin naǵyz erlik, tózimdilik pen janqııarlyq eńbektiń kásibı merekesimen shyn júrekten quttyqtaımyn! Eńbekterińiz árdaıym laıyqty baǵalanyp, qurmetke bólene bersin! — dedi ol.

Osydan buryn Prezıdent atynan shahterlerge joǵary memlekettik nagradalar tapsyrylǵanyn jazdyq.