Elimizde qolóner salasynyń normatıvti bazasy joq – Gúldara Nurymova
ASTANA. KAZINFORM – Naryq salasynda qolóner óndiris júıesi retinde óziniń jetekshi pozıtsııasyn joǵaltqanymen, ol álemniń kóptegen damyǵan elderinde áli de qyzmet etip keledi. Atalǵan sala shaǵyn kásipkerliktiń bir bóligi retinde kóptegen elderde memlekettik qoldaýǵa ıe bolyp júr. Al bizde qolóner salasynyń normatıvti bazasy qalyptaspaǵan. Májilis depýtaty Gúldara Nurymova Premer-Mınıstr orynbasary Tamara Dúısenovaǵa joldaǵan depýtattyq saýalynda osy máselege toqtaldy.
«Qazaq qolóneriniń tarıhy tereń. Ol halqymyzdyń ulttyq-mádenı biregeıligi men etnomádenıetin saqtaýǵa, jańa jumys oryndaryn qurýǵa jáne halyqaralyq naryqqa shyǵýǵa qyzmet etedi.Qazaq qolóneriniń paıda bolý ortalyqtarynyń biri – ejelgi Taraz qalasy. 2022 jyly Taraz Qazaqstan qalalarynyń ishinde birinshi bolyp qolónershi qalalardyń dúnıejúzilik tizimine endi. Sondaı-aq, Qazaqstanda ornalasqan ıÝNESKO-nyń Búkilálemdik mura tizimindegi 11 nysannyń 5-ýi Jambyl oblysynda ornalasqan. Bul aýqymdy oqıǵalar óńirdiń mádenı-rýhanı jáne týrıstik salalarynyń damýyna jańa serpin berdi», - deıdi depýtat.
Qazir qolóner kásipkerlikti qoldaý turǵysynan da, mádenı murany saqtaý turǵysynan da mańyzdy. Qolóner sheberligin urpaqtan-urpaqqa jalǵastyrý mańyzdy. Sondyqtan memleket oǵan jan-jaqty kómek kórsete otyryp, óz qamqorlyǵyna alýy kerek.
«Qazirgi ýaqytta elimizde qolóner salasynyń normatıvti bazasy joq. Týrıstik salany damytý tujyrymdamasyn iske asyrý jónindegi is-qımyl josparynyń 24-tarmaǵyna sáıkes 2023 jyldyń sońyna deıin tıisti mınıstrlikter men vedomstvolarǵa qolónershilikti damytý jóninde sharalar ázirleý tapsyrylǵan. Atap aıtqanda, qolónershilerdiń ulttyq tizilimin qalyptastyrý, ózin-ózi retteıtin uıym qurý, qolóner salasyndaǵy zańnamany jetildirý, basym týrıstik aýmaqtarda qolónershiler ortalyqtaryn ashý, qolóner ónimderiniń standartyn ázirleý, qolónershilerge arnalǵan marketpleısti damytý mindetteri qamtylǵan. Osy máseleler qolónershilerdiń aıtýynsha eshqandaı sheshim tappady», - deıdi Gúldara Nurymova.
Ultymyzdyń dástúrli mádenıetin qazirgi zaman tendentsııalaryna sáıkestendirý mańyzdy másele ekenin aıtqan depýtat ony sheshý úshin sharany qolǵa alýdy usyndy. Atap aıtqanda, qolóner salasyna memlekettik granttar, jeńildetilgen nesıe qarastyrý, qolónershilerge tsehtaryn jalǵa alýǵa jeńildik berý, halyqaralyq tájirıbeni eskere otyryp, ár óńirde tájirıbeli sheberlerdiń bilimin keıingi býynǵa berýi úshin balalar úıirmeleri bar, kórme zaldary bar qolóner ortalyqtaryn qurý. Sonymen qatar qazaqstandyq qolónershilerdiń «Sheber» respýblıkalyq baıqaýy jeńimpazdarynyń kollektsııasy negizinde zamanaýı qoldanbaly óner murajaıyn qurý. Materıaldar men jabdyqtardy satyp alýǵa, sheberhanalarǵa úı-jaılardy jalǵa alýǵa granttar arqyly qolónershilerge memlekettik qoldaý kórsetý.
