Elimizde kóliktiń dóńgelegin aýystyrý qyzmetiniń quny qansha
ASTANA. KAZINFORM - Jazǵy dóńgelekti qysqy dóńgelekke aýystyrý baǵasy qalaǵa jáne dıametrine qaraı 5 myńnan bastalyp, 20 myń teńgege deıin jetti. Kazinform tilshisi 20 qaladaǵy R16 jáne R18 dóńgelegin aýystyrý baǵasyn bildi.
Qolda bar derekterge súıensek, dıametri R16 bolatyn dóńgelekti aýystyrý baǵasy 5 myń teńgeden bastalyp, 14 myń teńgege deıin jetti. Al R18 dóńgelegin aýystyrý quny 8 myń teńgeden bastalyp, 20 myń teńgege deıin kóterildi. Demek dóńgelekti aýystyrý qyzmetiniń quny qalalarǵa baılanysty ózgerip otyrady.
Qysqy dóńgelekke aýystyrý qyzmeti qaıda arzan
Dıametri R16 bolatyn dóńgelek jıyntyǵyn aýystyrý qyzmeti Aqtaý men Óskemen qalalarynda 5 myń teńgeden bastalady. Pavlodar, Túrkistan men Tarazda 6 myń teńge bolsa, Shymkentte 7 myń teńge jáne odan joǵary.
R18 dóńgelegin qysqa daıyndaý qyzmetiniń baǵasy elimizde 8 myń teńgeden bastalady. Aqtaý men Túrkistanda osy baǵa tirkeldi. Taraz qalasynda dóńgelek jıyntyǵyn aýystyrý baǵasy - 9 myń teńge, Petropavl, Qyzylorda men Shymkentte - 10 myń teńge.
Qyzmet quny qaı qalada joǵary
Dıametri R16 bolatyn tórt dóńgelekti aýystyrý qyzmetiniń baǵasy Oral qalasynda - 14 myń teńge. Ári qaraı Aqtóbe qalasynda 10,6 myń teńge, Qostanaıda 10,4 myń teńge, sonymen birge Astana, Atyraý, Kókshetaý, Qaraǵandy men Jezqazǵanda qyzmet aqysy - 10 myń teńge.
Al dıametri R18 bolatyn tórt dóńgelekti aýystyrý baǵasy Oralda 20 myń teńge. Pavlolar men Taldyqorǵanda qyzmet aqysy - 15 myń teńge. Astana, Kókshetaý, Jezqazǵan men Semeıde 14 myń teńge bolsa, Qaraǵandy qalasynda dıametri R18 dóńgelegin 13 myń teńgege aýystyryp beredi.
Dóńgelektiń dıametri baǵaǵa qalaı áser etedi
Elimizde dıametri R16 dóńgelegine qaraǵanda R18 dóńgelegin aýystyrý baǵasy joǵary. Baǵa aıyrmasy 2 myń teńgeden bastalyp, 9 myń teńgege deıin jetedi. Sonyń ishinde Pavlodarda R18-di 15 myń teńgege, al R16-ny 6 myń teńgege aýystyrady. Taldyqorǵan men Óskemen qalalarynda ekeýiniń arasyndaǵy aıyrmashylyq 7 myń teńge bolyp tur. Almaty men Qostanaı, Astana, Qaraǵandy, Jezqazǵan qalalarynda baǵa aıyrmasy 4 myń teńge boldy.
Aqtaý, Atyraý, Aqtóbe, Oral, Petropavl, Kókshetaý, Qyzylorda, Túrkistan, Shymkent, Taraz jáne Qonaevta R16 men R18 arasyndaǵy aıyrmashylyq 2 myń teńgeden bastalyp, 6 myń teńgege jetti. Júrgizýshi dóńgelek jóndeý ornyna barmas buryn qyzmet aqysyna ne kiretinin surap alǵan durys. Kóbi dóńgelekti sheship alyp, qysqyǵa aýystyrady jáne dıskiniń maıysqan tusyn túzetip beredi. Baǵa dıskiniń túrine, dóńgelektiń jaǵdaıyna jáne qosymsha jumysyna qaraı ózgerýi múmkin.
Buǵan deıin habarlaǵanymyzdaı, Qazaqstanda kúnniń sýytýyna baılanysty qysqy dóńgelekterge suranys artqan. Osyny paıdalanǵan alaıaqtar ınternette arzan shına satamyz degen jeleýmen turǵyndardyń aqshasyn aldap alýǵa tyrysyp jatyr.
2026 jyly belgilengen merzimde qysqy shınalardy paıdalanbaǵany úshin aıyppul 5 aılyq eseptik kórsetkishti (AEK), ıaǵnı 21 625 teńge. Ákimshilik jaza qoldanylǵannan keıin bir jyl ishinde quqyq buzý qaıtalansa, aıyppul 20 AEK-ke nemese 86 500 teńgege deıin ósedi.
Sonymen birge elimizdegi tehnıkalyq baıqaý baǵasy týraly jazyldy.
