Elimizde kólik zerthanalaryn tekserýdiń jańa tártibi engizildi
ASTANA. KAZINFORM — QR Saýda jáne ıntegratsııa mınıstrligi Tehnıkalyq retteý jáne metrologııa komıteti Ulttyq akkredıtteý ortalyǵy kólik quraldarynyń konstrýktsııasynyń qaýipsizdigi týraly kýálikti (KQQKB) berý úshin kólik quraldaryna synaq júrgizetin synaq zerthanalaryn baǵalaý kezinde foto jáne beınetirkeýdi engizdi.
Endi sarapshy-aýdıtorlar synaq jabdyqtarynyń árbir birligin foto jáne beınejazbaǵa túsiredi: zaýyttyq nómirlerin, tehnıkalyq jaı-kúıin, ólsheý dıapazondaryn jáne jumys barysyn tirkeıdi. Bul jabdyqtyń naqty zerthanada ornalasqanyn jáne synaq júrgizý kezinde paıdalanylatynyn rastaýǵa múmkindik beredi ári ony uıymdar arasynda ýaqytsha aýystyryp qoıý múmkindigin boldyrmaıdy.
Jabdyqtan bólek, baqylaý synaqtarynyń júrgizilý barysy da beınejazbaǵa jazylady. Bul zerthananyń jumystardy óz betinshe oryndaıtynyn, málimdelgen jabdyqty paıdalanatynyn jáne bilikti personalmen qamtamasyz etilgenin rastaıdy. Osylaısha, akkredıtteý qujattardyń bar-joǵyn ǵana emes, zerthananyń naqty tehnıkalyq daıyndyǵyn da rastaıdy.
— Foto jáne beınematerıaldar baǵalaýdan keıin týyndaýy múmkin daýly jaǵdaılardy da boldyrmaýǵa kómektesedi. Olar qandaı jabdyqtyń paıdalanylǵanyn jáne synaqtardyń qalaı júrgizilgenin obektıvti túrde rastaýǵa múmkindik beredi. Túsirilim akkredıtteý sýbektileriniń kelisimimen jáne jasalǵan sharttar sheńberinde ǵana júzege asyrylady, — dep atap ótti Ulttyq akkredıtteý ortalyǵynda.
Pılottyq joba óziniń tıimdiligin kórsetti. Qazirgi ýaqytta foto jáne beınetirkeý KQQKB beretin zerthanalardy akkredıtteý kezinde ǵana emes, sondaı-aq salystyryp tekserý jáne kalıbrleý zerthanalarynda, ekologııalyq synaqtar men buzbaı baqylaý júrgizetin zerthanalarda da qoldanylady.
Búgingi tańda jańa tetik arqyly 55 zerthanaǵa baǵalaý júrgizildi.
Kelesi kezeńde jańa tásildi zańnamalyq turǵydan bekitý kózdelip otyr. Tıisti ózgerister qabyldanǵannan keıin foto jáne beınetirkeý zamanaýı akkredıtteý júıesiniń mindetti elementine aınalady. Bul synaq nátıjelerine degen senimdi arttyryp, baǵalaýdan formaldy túrde ótý múmkindigin barynsha azaıtady.
Sonymen qatar sáıkestikti baǵalaý rásimderiniń tolyq qadaǵalanýyn qamtamasyz etý maqsatynda UAO KQQKB berýge qatysatyn synaq zerthanalaryndaǵy jabdyqtardy sáıkestendirý jobasyn iske asyryp jatyr. Tańbalaý baǵalaý júrgizý kezinde jabdyqty jedel tsıfrlyq tekserýge múmkindik beredi. Jabdyqtardy sáıkestendirý KQQKB beretin akkredıtteý sýbektilerinen ótinimderdiń kelip túsýine qaraı turaqty negizde júrgiziledi. Jabdyqtardy sáıkestendirý «Sáıkestikti baǵalaý salasyndaǵy akkredıtteý týraly» zańǵa ózgerister engizilgenge deıin sharttyq qatynastar sheńberinde eki taraptyń ózara kelisimi negizinde júzege asyrylady. 2026 jylǵy 18 tamyzdaǵy jaǵdaı boıynsha jabdyqtar 40 sýbektiniń nysanynda sáıkestendirildi.
Budan bólek, kólik salasynda qyzmetin júzege asyratyn synaq zerthanalarynyń menshiginde bolýy tıis jabdyqtardyń eń tómengi qajetti kólemi belgilendi — 95%. Bul shara nomınaldy akkredıtteý tájirıbesin boldyrmaýǵa jáne synaq nátıjeleriniń durystyǵyn arttyrýǵa baǵyttalǵan.
Eske salaıyq, buǵan deıin ІІM júrgizýshilerdiń medıtsınalyq tekserýine qatysty ózgeristi túsindirgenin jazǵanbyz.
